Ծախսերը պետք է ուղղել տնտեսությունը «արթնացնող» ոլորտներին

«Բյուջեն արտացոլումն է այն իրողությունների, որոնք առկա են տնտեսությունում: Չի կարող երկրի տնտեսությունը ծանր վիճակում լինել և երկիրն ունենա «շռայլ» բյուջե: Եվ հակառակը, եթե տնտեսությունը զարգանում է, ապա դա իր արտահայտումը կգտնի բյուջեի կառուցվածքում»,– մեկնաբանելով խորհրդարանին ներկայացված 2017 թվականի բյուջեի և նոր կառավարության ծրագրային մոտեցումները, «Փաստի» հետ զրույցում ասաց տնտեսագետ Կառլեն Խաչատրյանը: Եկող տարվա պետական բյուջեն լիովին տեղավորվում է այն իրողությունների տրամաբանությունում, որոնք առկա են մեր երկրում:

«Եկող տարվա բյուջեն ընթացիկ տարվա պետական բյուջեի հետ համեմատելով՝ կարող ենք փաստել, որ ինչպես եկամուտների, այնպես էլ ծախսերի կառուցվածքում կտրուկ փոփոխություններ տեղի չեն ունեցել: 2017 թ.–ին բյուջեի եկամուտները 1 տրիլիոն 210 մլրդ դրամ է պլանավորված, որից 1 տրիլիոն 135 մլրդ դրամը ապահովվելու է հարկերի և տուրքերի հաշվին:Համեմատության համար նշենք, որ 2016 թ.–ի պետական բյուջեի եկամուտները 1 տրիլիոն 186 մլրդ դրամ էր, ստացվում է, որ եկող տարի կառավարությունը ակնկալում է մոտ 24 մլրդ դրամի չափով եկամուտների աճ»,– նշեց վերջինս:

Ինչ վերաբերվում է ծախսերին, ապա Կ. Խաչատրյանի խոսքերով, 2017 թ.–ին դրանք նախատեսվել են 1 տրիլիոն 360 մլրդ դրամ ծավալով, ինչը մոտ 17 մլրդ դրամով ավելի քիչ է, քան 2016 թ.–ի ծախսերը: «Ծախսային հոդվածների համամասնությունը գրեթե նույնն է: Մի փոքր աճել են պաշտպանության և սոցիալական ապահովության հատկացումները՝ համապատասխանաբար 2,5 և 4 մլրդ դրամով: Փոքր–ինչ նվազել են բնակարանային շինարարությանը և տնտեսական հարաբերություններին ուղղվող միջոցները. 2016 թ.–ի հատկացումների համեմատ դրանք նվազել են համապատասխանաբար 15 և 21 մլրդ դրամով: Կարևոր եմ համարում նաև փաստել, որ 2017 թ.–ի պետական բյուջեում մոտ 10 մլրդ դրամով նվազել է գործադիր և օրենսդիր մարմինների ծախսային հատկացումները: Սա թերևս պետք է պայմանավորել պետական ապարատի կրճատման, առկա ռեսուրսների օպտիմալ օգտագործման, պետական կառույցների գործառույթների հստակեցման և դրանց կրկնությունը բացառելուն ուղղված քայլերով, որոնք իրականացվում են վերջին շրջանում»,– ընդգծեց Կ. Խաչատրյանը:

«Կտրուկ, կոշտ քայլերի միջոցով է հնարավոր տնտեսումներ անել և բյուջեի սուղ միջոցներն ուղղել առավել հրատապ խնդիրների լուծմանը: Պետական բյուջեի առումով մեր հիմնական խնդիրը պետք է լինի պետական եկամուտների ավելացումն ու տնտեսությանը դրական ազդակներ հաղորդող ծրագրերի համար անհրաժեշտ հատկացումներ կատարելը: Այս իմաստով հաջողության բանաձևը ստվերային տնտեսության կրճատման միջոցով բյուջետային եկամուտների ավելացումն է և հավելյալ արժեքի ստեղմանն ուղղված միջոցառումների իրականացումը»,– նշեց Կ. Խաչատրյանը:

Նունե Սարգսյան