Դեկտեմբերի 9-ին Հայաստանի մանուկներ հիմնադրամը (COAF) Նյու Յորքում կազմակերպելու է բարեգործական երեկո

Մանուկ Սահակյանը ֆեյսբուքյան իր էջում գրում է . 

Դեկտեմբերի 9-ին Հայաստանի մանուկներ հիմնադրամը (COAF) Նյու Յորքում կազմակերպելու է բարեգործական երեկո, որի մասնակիցները կօգնեն եւ իրենց աջակցությունը կհայտնեն Հայաստանի երեխաներին։

Հայաստանի մանուկներ հիմնադրամը (COAF) բարեգործական կազմակերպություն է, որի նպատակն է բարձրացնել գյուղաբնակների կյանքի որակը համայնքային զարգացման երեխայակենտրոն ծրագրերի միջոցով: Հիմնադրամի համակողմանի ծրագրային մոդելի իրագործումն սկսվել է 2004թ., և այդ ժամանակից ի վեր զուգահեռաբար իրականացվում են կրթական, առողջապահական, սոցիալական և տնտեսական ծրագրեր, ինչպես նաև հիմնանորոգվում են համայնքների համար կենսական նշանակություն ունեցող ենթակառուցվածքները: Վերջին 10 տարիների ընթացքում Հիմնադրամի կողմից կիրառվող մոդելն զգալի արդյունքներ է ունեցել: Ծրագրային հաջողությունների և փորձի վերլուծությունը թույլ է տալիս հավակնել, որ այն կարելի է տարածել և դարձնել կրկնօրինակելի մոդել:

Այսօր ծրագրերի շահառուները Հայաստանի Արմավիրի, Արագածոտնի, Լոռու, Գեղարքունիքի, Տավուշի և Շիրակի մարզերի 44 համայնքների ավելի քան 67,000 բնակիչներն են: Հաջորդ տասնամյակում 100 նոր գյուղ ընդգրկելու նպատակով Հիմնադրամը ներկայումս հետազոտում է այլ մարզեր ևս՝ իր ծրագրերը ներդնելու համար: Իր առաքելությանը համահունչ՝ առաջադեմ և բարեկարգ համայնքներ կերտելու նպատակով Հայաստանի մանուկներ հիմնադրամը մշակել և իրագործում է նոր տեսլական՝ ՍՄԱՐԹ նախաձեռնություն: ՍՄԱՐԹ-ը կրթության միջոցով առաջխաղացում է ապահովելու գյուղական աշխարհի համար, ինչի արդյունքում շահում են անհատները, հասարակությունը և միջավայրը: Առաջին ՍՄԱՐԹ կենտրոնը կառուցվում է Լոռու մարզում: Աշխարհում եզակի այս նախաձեռնությունը դառնալու է զարգացման մոդել, որը կրկնօրինակվելու է Հայաստանի այլ մարզերում և համայնքներում ու նաև աշխարհում։ 
Հ․Գ․ Կոչ եմ անում բոլորին իրենց մասնակցությունը ունենան բարեգործական երեկույթին։