Իրավական խորհրդատու
Հասարակություն
Հարց – Կարող եմ, արդյոք, ինձ պատկանող բնակարանը հանձնել վարձով՝ բանավոր պայմանավորվածության հիման վրա:
Պատասխան – Հարցի ձևակերպումը սխալ է: Հանձնել կարող էք, սակայն ապագայում օրենքի տեսանկյունից կարող են առաջանալ բազմաթիվ խնդիրներ: Բնակարանը պետք է հանձնվի վարձակալության գրավոր պայմանագրի հիման վրա: Ուստի, Ձեզ խորհուրդ, վարձակալի հետ կնքեք այդ պայմանագիրը:
Հարց – Որոշել ենք վաճառել մեր բնակարանը, սակայն գնորդը խոստանում է գումարը վճարել պայմանագրի կնքումից 2 ամիս անց: Ինչպե՞ս կարող ենք ապահովագրել մեզ, որպեսզի գնորդը չկարողանա գնված բնակարանը վաճառել՝ մինչև չտա մեր գումարը:
Պատասխան – Ձեզ անհրաժեշտ է պայմանագրում նախատեսել կետ, ըստ որի` վաճառված բնակարանի նկատմամբ Դուք ձեռք եք բերում գրավի իրավունք մինչև Ձեզ հասանելիք գումարի լրիվ վճարումը: Եվ, ամենակարևորը, այդ պայմանագիրը ներկայացրեք անշարժ գույքի կադաստրի մարմիններ՝ գրավի իրավունքը գրանցելու համար:
Հարց – Մեր շենքում կա ընդամենը 10 բնակարան: Վարչական շրջանից մեզ պարտադրում են ստեղծել համատիրություն կամ մտնել արդեն գոյություն ունեցող համատիրության մեջ, ինչը մենք չենք ցանկանում: Պարտադի՞ր է, արդյոք, համատիրություն ստեղծել կամ մտնել ինչ–որ համատիրության մեջ:
Պատասխան – Ոչ, պարտադիր չէ: Ընդհանուր բաժնային սեփականության կառավարումը կարող է իրականացվել հետևյալ ձևերով` ա) շինության սեփականատերերի կողմից ստեղծված իրավաբանական անձի համատիրության միջոցով. բ) լիազորագրային կառավարչի (ներկայացուցչության) միջոցով. գ) հավատարմագրային կառավարչի միջոցով: Այսինքն, Դուք, համատիրություն ստեղծելու փոխարեն, կարող եք այդ գործառույթները պատվիրել ինչ–որ մի անձի և դրա դիմաց վարձատրել:
1
2
3
4
5
1
2
3
4
5
1
2
3
4
5
