Կիլիկիո կաթողիկոսությունը Սիսի տարածքի վերադարձի հայցով դիմում է ՄԻԵԴ Թուրքիայի դեմ. հայցը կներկայացվի այսօր

Թուրքիայի Սահմանադրական դատարանը մերժել է Սիսի կաթողիկոսարանի տարածքի վերադարձի մասին Մեծի Տանն Կիլիկիո կաթողիկոսության պահանջով դատի քննարկումը եւ Մեծի Տանն Կիլիկիո կաթողիկոսությունը որոշել է դիմել Մարդու իրավունքների եվրոպական դատարան:

Մեծի Տանն Կիլիկի կաթողիկոսությունից NEWS.am-ին հայտնում են, որ հայցը կներկայացվի այսօր՝ դեպտեմբերի 6-ին:

«Դեկտեմբերի 6-ը կարեւոր օր է լինելու ընդհանրապես հայ ժողովրդի եւ մասնավորապես հայ եկեղեցու համար: Սա առաջին իրավական քայլն է ընդդեմ Թուրքիայի` 1915 թվականի Հայոց ցեղասպանությունից հետո: Իրավական այս գործընթացը երկար եւ լուրջ մտորումների, խորհրդակցության եւ ուսումնասիրության արդյունք է` հիմնված միջազգային իրավունքի վրա, այդ թվում եւ 1932 թվականի Լոզանի կոնֆերանսի որոշումների վրա, որն առնչվում է Թուրքիայի Հանրապետության սահմաններում բնակվող փոքրամասնություններին»,- հայտարարել է Արամ Ա կաթողիկոսն իր ուղերձում:

Նշվել է նաեւ, որ դեկտեմբերի 7-ին, Բելգիայում մամուլի ակումբում կեսօրից հետո տեղի կունենա մամուլի ասուլիս` մասնակցությամբ տեղական ու միջազգային գործակալությունների, քաղաքական պատասխանատուների եւ հասարակական կազմակերպությունների ներկայացուցիչների: Մամուլի ասուլիսին մասնակցելու ենՎեհափառ Հայրապետի ներկայացուցիչը, Բրյուսելի Հայ Դատի գրասենյակի տնօրենը եւ հիշեալ դատը հետապնդող իրավաբանների խմբակի հինգ անդամները:

Հիշեցնենք, որ 2015 թվականի ապրիլի 28-ին Մեծի Տանն Կիլիկիո կաթողիկոսությունը եւ Արամ Ա կաթողիկոսը դիմել են Թուրքիայի Սահմանադրական դատարան՝ պահանջելով իրենց վերադարձնել Սիսի կաթողիկոսարանի տարածքը: Թուրքիայի ՍԴ-ն իր հերթին դիմել է երկրի արդարադատության նախարարությանը, վերջինս էլ մերժել է դատը՝ համարելով որ այն դուրս է ՍԴ-ի իրավասության շրջանակներից: