Համատեղ աուդիտը Կրեմլին հնարավորություն կտա Հայաստանում անել այն, ինչն ամերիկացիներն արեցին Վրաստանում

Արման Մելիքյանը ֆեյսբուքյան իր էջում գրում է.

Դժվար թե կարելի է պատահական համարել այն, որ էլեկտրաէներգիայի սակագնի կտրուկ բարձրացման նախաձեռնությունն ու երևանյան բողոքի ցույցերի ալիքը հաջորդեցին Որոտանի ՀԷԿ-ի գործարքի հաստատումից հետո:

Որոտանի ՀԷԿ-ի վաճառքի գործում բացառիկ շահագրգռվածություն դրսևորեց ՀՀ-ում ԱՄՆ դեսպանությունը: Դժվար թե Հայաստանում կգտնվեն մարդիկ, որոնք լուրջ հիմքեր կունենան ասելու, որ մեր երկրում էներգակիրների վաճառքի գործընթացը զերծ է կոռուպցիոն բաղադրյալից՝ առնվազն էլեկտրականության և գազի մատակարարումը շարքային սպառողին իրականացվում է այնպես, որ մարդիկ չգիտեն, թե իրենց վճարած գումարները քանի տեղ են բաշխվում ու քանի մասնավոր գրպան են լցվում մութ աճպարարությունների արդյունքում: Կարելի է ենթադրել, որ Որոտանի ՀԷԿ-ի վաճառքը խախտեց մինչ այժմ գոյություն ունեցած պաշտոնական ու գաղտնի փողաբաշխման համակարգի բնականոն աշխատանքը և դա, հավանաբար, կապված է այն հանգամանքի հետ, որ էլեկտրաէներգիայի գոնե այդ արտադրողը չի պատրաստվում մասնակցել ստվերային գործարքների:

ՀԷՑ-ի ռուսաստանյան տերերն արդեն ասում են, որ պարտքերը կուտակվել են այն պատճառով, որ ընկերությունը ստիպված է եղել արտադրողներից էլեկտրաէներգիա գնել անարդարացիորեն բարձր գնով, ակնարկելով, որ դա արվել է ՀՀ իշխանությունների պահանջով: Սակագնի խնդրի հետ կապված զարգացումները ՀՀ և ՌԴ իշխանության ներկայացուցիչներին հանգեցրին ՀԷՑ-ի գործունեության համատեղ աուդիտ անցկացնելու որոշմանը: Սա մի նոր հանգրվան կարող է դառնալ Հայաստանի և Ռուսաստանի քաղաքական վերնախավերի փոխհարաբերությունների զարգացման համատեքստում՝ աուդիտի արդյունքում ռուսական կողմը կարող է հայաստանյան իշխանական և մերձիշխանական շրջանակների հանդեպ նախաձեռնել կոռուպցիոն զտումների գործընթաց, որին հակազդելու հնարավորություն և, գուցե, ցանկություն էլ չի ունենա պարոն Սերժ Սարգսյանը:

Մեծ հաշվով, հնարավոր բացահայտումների արդյունքում հարվածի տակ կարող են ընկնել ՀՀ կառավարության ոչ միայն գործող, այլև նախկին անդամներն ու տարբեր կարգի չինովնիկները: Այլ հարց է, թե արդյոք ռուսական կողմը կցանկանա սկանդալային բացահայտումների միջոցով իրավիճակ փոխել Հայաստանում, թե կնախընտրի անդրկուլիսային շանտաժի մեթոդը:

Բոլոր դեպքերում համատեղ աուդիտը Կրեմլին տեսականորեն հնարավորություն կընձեռի Հայաստանում անել այն, ինչն ամերիկացիներն արեցին Վրաստանում նախագահ Սահակաշվիլիի միջոցով, և, իրենց բացառիկ ազդեցության ներքո գտնվող փոքրիկ մեր երկրում, ռուսական ժողովրդավարության մինչ այժմ անհայտ մոդել կկառուցեն: