Գերմանիայի դեսպանը կանչվել է Թուրքիայի ԱԳՆ
Header
Թուրքիայում Գերմանիայի դեսպան Մարտին Էրդմանը կանչվել է արտաքին գործերի նախարարություն: Ինչպես հաղորդում է թուրքական «Անադոլու» գործակալությունը, Թուրքիայի արտաքին քաղաքական գերատեսչությունում հայտնել են իրենց բողոքը' կապված ոստիկանության կողմից Քյոլնի օդանավակայանում Թուրքիայի Ազգային մեծ ժողովի փոխնախագահ Այշե Նուր Բահչեքափըլըին պահելու հետ:
ԱԳՆ-ում մասնավորապես հայտնել են, որ «Գերմանիայի օդանավակայանում տեղի ունեցածը չի համապատասխանում դիվանագիտական էթիկային, տհաճ է և անընդունելի»:
Քյոլնում անհայտ անձինք գողացել էին Թուրքիայի Ազգային մեծ ժողովի փոխնախագահ Այշե Նուր Բահչեքափըլըի պայուսակը, որի մեջ են եղել անձնագիրն ու անձը հաստատող այլ փաստաթղթեր: Պատգամավորը ոստիկանությանը բողոք էր ներկայացրել, Թուրքիայի հյուպատոսարանից ժամանակավոր անձնագիր էր վերցրել, սակայն օդանավակայանում իրավապահ մարմինները նրան միառժամանակ պահել էին և որոշ հստակեցումներ անելուց հետո միայն թույլատրել վերադառնալ Թուրքիա:
Բահչեքափըլըն հայտարարել էր, որ օդանավակայանում վատ վերաբերմունքի է արժանացել, ձերբակալվել է և պահվել հանցագործների հետ: «Շատ նվաստացուցիչ էր իմ երկրի համար: Մենք գերմանացի կամ այլ օտարերկրյա խորհրդարանականի նկատմամբ հարգանք ենք դրսևորում: Շատ վատ պահ անցկացրի»,- ասել է Բահչեքափըլըն:
Գերմանիայի ոստիկանությունը հերքել է թուրք պատգամավորին ձերբակալելու փաստը: Գերմանական կողմը հայտնել է, որ օդանավակայանում միանգամից չեն թույլատրել թռիչքը, քանի որ Բահչեքափըլըի ունեցած ժամանակավոր անձնագրում չի եղել տեղեկություն վիզայի վերաբերյալ:
1
2
3
4
5
1
2
3
4
5
1
2
3
4
5
