Շթայնմայեր. Ղարաբաղում էսկալացիան ցուցադրեց խաղաղության եվրոպական ճարտարապետության խոցելիությունը

Ուկրաինայի արեւելքի իրավիճակը եւ Լեռնային Ղարաբաղում էսկալացիան ցուցադրում են, թե որքան խոցելի է դարձել խաղաղության եվրոպական ճարտարապետությունը: Այս մասին դեկտեմբերի 8-ին հայտարարել է Գերմանիայի ԱԳ նախարար Ֆրանկ-Վալտեր Շթայնմայերը՝ ելույթ ունենալով ԵԱՀԿ անդամ երկրների ԱԳ նախարարների գագաթնաժողովի շրջանակներում հրավիրված մամուլի ասուլիսում:

Նրա խոսքով՝ Արեւելքի եւ Արեւմուտքի միջեւ երկխոսությունը առավել հրատապ է դառնում: «Հելսինկյան եզրափակիչ ակտի սկզբունքները ինչպես երբեք կարեւոր են: Եթե նույնիսկ մենք ի վիճակի չենք կարգավորել եւ հաղթահարել բոլոր հակամարտությունները, բացարձակապես առանցքային է այն, որ համատեղ ջանքեր ենք ներդնում ԵԱՀԿ-ի եւ հակամարտությունների կառավարման նրա գործիքների ամրապնդման համար: Մենք այս բոլոր հարցերը միասին ենք քննարկում»,- նշել է Շթայնմայերը:
Նախարարի խոսքով՝ ԵԱՀԿ-ը հակամարտությունների գոտիներում՝ Արեւելյան Ուկրաինայում եւ Լեռնային Ղարաբաղում, հիանալի աշխատանք է կատարում: «Այդ աշխատանքն իրականացնելով՝ ԵԱՀԿ-ը վատագույն իրավիճակներ է կանխել, երբեմն նաեւ բացահայտ պատերազմը: Մյուս կողմից՝  եթե դիտարկենք Մերձդնեստրը, որտեղ ԵԱՀԿ-ը երկար տարիներ է աշխատել, կարող ենք նշել, որ կազմակերպության շնորհիվ հակամարտության կողմերը դարձյալ բանակցությունների սեղանի շուրջ են նստել: Դրանք լուրջ հաջողություններ են: Կարծում եմ, որ ԵԱՀԿ-ը էական դեր է խաղում Եվրոպայում խաղաղության հաստատման համար»,- ամփոփել է Շթայնմայերը: