Նալբանդյանը Էստոնիայի ԱԳ նախարարին է ներկայացրել ԼՂ խնդրի լուծմանն ուղղված ջանքերը

Հայաստանը բարձր է գնահատում Էստոնիայի հավասարակշիռ դիրքորոշումը Լեռնային Ղարաբաղի հակամարտության կարգավորման հարցում: Այս մասին, դեկտեմբերի 8-ին, Համբուրգում ԵԱՀԿ երկրների արտգործնախարարների 23-րդ խորհրդի շրջանակներում Էստոնիայի արտաքին գործերի նախարար Սվեն Միկսերի հետ հանդիպման ժամանակ նշել է ՀՀ արտգործնախարար Էդվարդ Նալբանդյանը:

ԱԳՆ-ից NEWS.am-ին հայտնում են, որ հանդիպման սկզբում Էդվարդ Նալբանդյանը շնորհավորեց Սվեն Միկսերին` Էստոնիայի ԱԳ նախարարի պաշտոնը ստանձնելու կապակցությամբ եւ հույս հայտնեց, որ համատեղ ջանքերի շնորհիվ նոր լիցք կհաղորդվի երկկողմ փոխգործակցությանը:

Հայաստանի արտգործնախարարը գոհունակություն հայտնեց Հայաստանի եւ Էստոնիայի միջեւ քաղաքական երկխոսության դրական դինամիկայով` շեշտելով, որ Հայաստանը հետաքրքրված է զարգացնելու եւ ամրապնդելու հայ-էստոնական հարաբերությունները: Որպես կարեւոր քայլ այս ուղղությամբ նշվեց իրավապայմանագրային դաշտի ընդլայնման անհրաժեշտությունը:

Հանդիպմանն անդրադարձ կատարվեց Հայաստան-Եվրամիություն նոր իրավական հիմքի շուրջ բանակցությունների ընթացքին, շեշտվեց մուտքի արտոնագրային ռեժիմի ազատականացման շուրջ երկխոսության մեկնարկի կարեւորությունը։

Էստոնացի գործընկերոջ խնդրանքով Հայաստանի արտաքին քաղաքական գերատեսչության ղեկավարը ներկայացրեց ղարաբաղյան հիմնախնդրի կարգավորման գործընթացն առաջ մղելու նպատակով համապատասխան պայմանների ստեղծմանն ուղղված Հայաստանի եւ ԵԱՀԿ Մինսկի խմբի համանախագահ երկրների ջանքերը։ Այս համատեքստում Էդվարդ Նալբանդյանը նշեց, որ Հայաստանը բարձր է գնահատում Էստոնիայի հավասարակշիռ դիրքորոշումը Լեռնային Ղարաբաղի հակամարտության կարգավորման հարցում: