Ընտրողներն իրենց ձայնը տվել են Ծառուկյանին, ոչ թե ցուցակի այս կամ այն անձին. Նաիրա Զոհրաբյան

Հաջորդ խորհրդարանում չպետք է լինեն այն անձինք, որոնց համար մանդատը հարակից ատրիբուտ է: Այսօր` դեկտեմբերի 15-ին, խորհրդարանում նոր Կանոնակարգ- օրենքի քննարկման ժամանակ նման կարխիք հայտնեց ԲՀԿ խմբակցության ղեկավար Նաիրա Զոհրաբյանը:

«Այդ պատգամավորները պետք է երկար մտածեն` այդ լրացուցիչ ատրիբուտը` մանդատը, պե՞տք է, թե՞ լրացուցիչ գլխացավանք է դառնալու իրենց գլխին, քանի որ հաջորդ խորհրդարանում նրանք դիսկոմֆորտ են զգալու»,- ասաց նա:

Ըստ ԲՀԿ խմբակցության ղեկավարի` Կանոնակարգ- օրենքը երկրորդ ընթերցման է ներկայացվել փոփոխություններով, սակայն իրենց մի սկզբունքային առաջարկ չի ընդունվել, այն է` բացասական եզրակացություն ստացած նախագիծը հեղինակը խորհրդարանում ներկայացնելու համար պետք է պատշաճ ժամանակ ստանա, ոչ թե ընդամենը 3 րոպե, ինչպես ամրագրված է նախագծում:

«Նշանակում է` ասում եք, թե ձեզ էլ գալըչկայի համար ձայն տվեցինք, մի բառ ասելու սերիայից է: Տվեք հնարավորություն, որ նախագծի մասին հեղինակը ներկայացնի իր կարծիքը, որովհետեւ բոլորս էլ գիտենք` հենց Կառավարությունը OK է տալիս, հանձնաժողովն էլ դրական եզրակացություն է տալիս, եթե բացասական եզրակացություն է տալիս, նույնն էլ հանձնաժողովն է անում: Մինչդեռ նախագիծն ընդունել- չընդունելու որոշումը կայացնում է խորհրդարանը»,- ասաց Նաիրա Զոհրաբյանը` հավելելով, որ դեկորատիվ ատրիբուտիկան պետք է հանել, արհեստական, սինթետիկ դրույթներից պետք է ազատվել:

Իր ելույթի վերջում արդեն Նաիրա Զոհրաբյանն անդրադարձավ իրենց այն առաջարկին, որ խմբակցությունից դուրս եկող պատգամավորը չպետք է օգտվի խմբակցություններին տրված լիազորություններից, հատկապես նրանք, որոնք դուրս գալուց հետո վարկաբեկում են այդ խմբակցությանը:

«Ժողովուրդն ընտրում է ոչ թե այս կամ անձին, այլ կուսակցության լիդերին եւ կուսակցության գաղափարախոսությունը: Բերեմ մեր օրինակը. թե 2007թ.-ին, թե 2012թ.-ին, քաղաքացիներն իրենց ձայները տվել են Գագիկ Ծառուկյանին եւ մեր կուսակցության նախընտրական ծրագրին, եթե որեւէ մեկ ուրիշը կարող է ասել` հենց իրեն են ձայն տվել, այդ գնահատականը ազնիվ չեմ համարում: Իհարկե, նապոլեոնիզմը եւ բոնապարտիզմը մեր քաղաքական դաշտում շատ լուրջ շեղում է, նույնիսկ հոգեբուժության մեջ այն անբուժելի է եւ խորանալու եւ անդառնալի գործընթացի վերածելու հակում ունի: Բայց հայտնի է, որ ընտրողը ձայնը տալիս է կուսակցության թրենդ դարձած անձին եւ նախընտրական ծրագրին: Այն գործիչները, որոնք հետագայում գտնում են, որ իրենց վեհ գաղափարները չեն համընկնում խմբակցության եւ կուսակցության գաղափարների հետ, պետք է վայր դնի կուսակցության եւ խմբակցության կողմից ստանձնած պարտականությունները»,- ասաց նա:

Նշենք, որ Ծառուկյանի` ԲՀԿ-ից հեռանալուց հետո շատ պատգամավորներ դուրս եկան նաեւ խմբակցությունից: Այնուհետեւ արդեն նրանցից շատերը նոր կուսակցություններ ստեղծեցին, որից հետո արդեն խժդժություններ սկսվեցին հենց խմբակցության ներսում: