Ձնաբքի պատճառով M1 միջպետական ավտոճանապարհին երթեւեկությունը կաթվածահար է. լուսանկարներ

Երեւան-Գյումրի M1 միջպետական ավտոճանապարհին մի քանի ժամ է` կաթվածահար է եղել երթեւեկությունը: Ձնաբքի պատճառով անանցանելի դարձած մայրուղու ամբողջ երկարությամբ մեքենաների կուտակումներ են Գյումրի-Թալին հատվածում:

Ձնաբքի մեջ թաղված մեքենաների թվում առկա են նաեւ ոստիկանության ծառայողական մեքենաներ:

Վարորդները բարձրաձայնում են ձյան թերի մաքրման աշխատանքների եւ ավազային խառնուրդով ճանապարհները չմշակելու մասին:

«Ժամը 2-ից ստեղ եմ, երկու ժամ է` հնարավոր չէ առաջ գնալ: Տեխնիկա չի աշխատել ստեղ: Էնքան, որ մի թեթեւ անցել է: Ձյան տակը լրիվ սառույց է, մի ժամից էլ ավելի կսառի`ընդհանրապես անցնել չի լինի»,- Armtimes.com-ի հետ զրույցում բողոքեց վարորդներից մեկը:

Շիրակի մարզպետարանից Armtimes.com-ին փոխանցեցին, որ անցած գիշերվանից տեղացած առատ ձյան եւ շարունակվող բքի պատճառով դժվարանցանելի են Շիրակի մարզի բոլոր ճանապարհները: Մի շարք ճանապարհահատվածներում առկա է նաեւ ցածր տեսանելիություն: Մարզը սպասարկող ճանապարհաշինական ընկերությունները ճանապարհներն անցանելի դարձնելու նպատակով ոտքի են հանել ողջ տեխնիկան:

ՀՀ արտակարգ իրավիճակների նախարարության տարածած հաղորդագրության համաձայն` դեկտեմբերի 14-ի ժամը 17.00-ի դրությամբ ՀՀ տարածքում ավտոճանապարհները հիմնականում անցանելի են:

Փակ են Վարդենյաց լեռնանցքը եւ Ամասիա-Գյումրի, Գյումրի-Բավրա ավտոճանապարհները:

Դժվարանցանելի են Դիլիջանի, Տիգրանաշենի (Քյարքի) ոլորանները, Ջաջուռ-Լուսաղբյուր, Սոթք-Քարվաճառ, Վանաձոր-Գյումրի, Բերդ-Ճամբարակ, Մաստարա-Լանջիկ, Ալագյազ-Ծիլքար, Արթիկի, Ախուրյանի տարածաշրջանների, Կոտայքի մարզի գրեթե բոլոր ավտոճանապարհները:

Սարավան-«Զանգեր» ավտոճանապարհին տեղ-տեղ առկա է մերկասառույց:

Տավուշի, Արագածոտնի, Արարատի, Լոռու, Կոտայքի, Արմավիրի, Գեղարքունիքի մարզերում, Վայոց ձորի մարզի Ջերմուկ քաղաքում, Ելփինի ոլորաններին, Սյունիքի մարզի Գորիս քաղաքում, Սիսիան-«Զանգեր» ճանապարհահատվածին առկա են տեղումներ ձյան տեսքով:

Սարավան-«Զանգեր», Գորիս-Կապան ավտոճանապարհներին եւ Չայնիի ոլորաններին մառախուղ է:

Վրաստանի ՆԳՆ ԱԻ դեպարտամենտից ստացված տեղեկատվության համաձայն Ստեփանծմինդա-Լարս ավտոճանապարհը փակ է բոլոր տեսակի ավտոմեքենաների համար: