Կգուշակե՞ս, թե որ հայ հայտնի երգչուհու փոքրիկն է այսպես հիանում մայրկի զարդարած տոնածառով

Exclusive

Ամանորին ընդառաջ BlogNews.am-ը պարբերաբար զրուցում է հայ հայտնի մայրիկների հետ, ովքեր պատմում են՝ ինչպես են պատրաստվում դիմավորել նոր տարին, ինչ անակնկալներ են նախատեսել իրենց բալիկների համար, որտե՞ղ են անցկացնելու տարվա ամենասպասված տոնը: 

Այսօր զրուցել ենք երիտասարդ երգչուհի և հրաշալի մայրիկ Անուշիկ Ալավերդյանի հետ, ում նախատոնական տրամադրությունն ուղղակի հիանալի էր, քանի որ նախօրեին արդեն զարդարել էր տոնածառն ու տեսել իր փոքրիկի հիացած աչուկները:

«Իրականում սա Մայայի առաջին տոնածառը չէ, անցած տարի էլ ենք զարդարել ծառը, նույնիսկ գեղեցիկ ֆոտաշարք ենք ունեցել, բայց աղջիկս շատ փոքր էր ու տպավորություններ գրեթե չուներ: Իսկ այս տարի լրիվ այլ տեսարան էր. առավոտյան մտավ սենյակ, շշմած նայում էր լույսերին, մոտենում, ձեռք տալիս խաղալիքներին ու ժպտում»:

Այն հարցին, թե արդյոք Ձմեռ պապ կհրավիրեն փոքրիկի համար, մեր նախորդ զրուցակիցների պես Անուշիկը ևս պատասխանեց, որ չի հրավիրելու, որովհետև Ձմեռ պապերը այդ տարիքի երեխաներին ավելի շուտ վախեցնում են, քան ուրախացնում: Ամանորը դիմավորելու հետ կապված Անուշիկը հստակ որոշել է տանը մնալ ու ոչ մի գործնական առաջարկ չի ընդունել. «Ամուսինս կեսգիշերից հետո նվագելու հրավեր ունի, տանը չի լինելու, իսկ ես որոշել եմ ամանորյա գիշերը տանը անցկացնել: Մայան այդ ժամին քնած կլինի, ես էլ պասիվ ու հանգիստ ինձ համար կվայելեմ ժամանակս»:

Տոնական սեղանի պատրաստության հարցում երգչուհին այդքան էլ ակտիվ չէ, քանի որ այդ հաճելի պարտականությունը նրա մայրն է միշտ կատարում, սակայն տոնական աղցաններ երգչուհին մեծ սիրով է պատրաստում:

Նոր տարվա հետ ասոցիացվող ուտելիքը Անուշիկի համար «բլինչիկն» է, որն իր մայրիկը շատ համեղ է պատրաստում ոչ միայն Ամանորին, այլ նաև ողջ տարվա ընթացքում: Իսկ գալիք տարվա հետ կապված երգչուհին, ինչպես և ցանկացած մայրիկ, շատ պլաններ ունի՝ կապված իր փոքրիկի հետ: Անուշիկը նաև նշեց, որ ստեղծագործական պլաններ ևս շատ կան, որոնց իրագործման համար պետք է աշխատել ու աշխատել:

Նյութը՝ Արմինե Հայրապետյանի

Լուսանկարները՝ երգչուհու անձնական արխիվից