200 մլն դոլար վարկային համաձայնագրին կողմ քվեարկեց 98, դեմ՝ 1 պատգամավոր

Yerkir.am-ը գրում է.

Այսօր ԱԺ` կառավարության նախաձեռնած արտահերթ նիստում քննարկվում է ՀՀ նախագահի ներկայացրած` ՀՀ կառավարության և ՌԴ կառավարության միջև կնքված` ՀՀ կառավարությանը 200 միլիոն դոլարի չափով պետական արտահանման վարկ տրամադրելու մասին համաձայնագրի վավերացման հարցը: Վարկային համաձայնագիրը սուր քննադատության ենթարկեցին ԱԺ ընդդիմադիր պատգամավորներ Հրանտ Բագրատյանը, Նիկոլ Փաշինյանը և Զարուհի Փոստանջյանը:

ՀՀԿ-ական Վարդան Այվազյանը փորձեց պաշտպանել համաձայնագիրը: Նա նշեց, որ եթե Ադրբեջանը փորձի կոնկրետ գործողություններ ձեռնարկել Հայաստանի դեմ, այդ նույն ընդդիմախոսների ոգեշունչ ելույթները դրա դեմը չեն առնի,և որ դրա դեմը կարող է առնել միայն կոնկրետ միջոցները, որոնց համար հիմք է ստեղծում այդ վարկային համաձայնագիրը:

Նա կոչ արեց վերացնել կասկածամտությունը, և չանել ամպագորգոռ հայտարարություններ: «Ասում ա՝ արի իմ գործարանից զենքը գնի էն պայմաններով , որով ես իմ բանակին եմ տալիս, վատ ա՞ ասում: Տոկոսների մասին, չուզի՞ իրա փողը, եթե մենք ուշացնենք»,- ասաց պատգամավորը: Ինչ վերաբերում է դոլարով գործարքին, ինչի դեմ արտահայտվեց Արծվիկ Միանսյանը, Վարդան Այվազյանը նշեց, որ կարող է տատանվել ոչ միայն դոլարը, այլ նաև ռուբլին: Վարկային համաձայնագիրը դրվեց քվեարկության, կողմ քվեարկեցին 98 պատգամավոր, ձեռնպահ 0, և դեմ 1 պատգամավոր: