ՀԱԿ-ին կհաջողվի քաղաքականացնել ԱԺ ընտրությունները, ինչպես արեցինք միայնակ Սահմանադրական հանրաքվեին. Զուրաբյան

ՀԱԿ–ը սովորական կուսակցություն չէ, այն եղել եւ մնում է շարժում, որը ձեւավորվել է 1988 թվականին եւ չի սահմանափակվել սոցիալական խմբերի օրակարգով, այլ ձեւավորել է երկրի գլխավոր մարտահրավերը: Այս մասին այսօր` դեկտեմբերի 17-ին, ՀԱԿ 2-րդ համագումարի ժամանակ ասաց Լեւոն Զուրաբյանը:

Զուրաբյանը ներկայացրեց, թե ինչ է արել իրենց շարժումը վերջին 28 տարիներին: Այնուհետեւ պատգամավորն առանձին անդրադարձավ քառյակի ձեւավորմանը:

«Ակնհայտ էր, որ ՀԱԿ-ը միայն ընդդիմության ուժերով չէր կարող լուծել իշխանափոխության հարցը, որդեգրվեց ԲՀԿ-ի եւ այլ ուժերի համագործակցության հիման վրա ՀՀԿ-ի քաղաքական մեկուսացման ծրագիրը: ԲՀԿ-ն հրաժարվեց ՀՀԿ-ի հետ միասնական ցուցակ կազմելուց, իսկ ընտրություններից հետո դուրս եկավ կոալիցիայից: Այնուհետեւ արդեն ոչ իշխանական չորս ուժերը սկսեցին համագործակցել, քառյակն ակտիվ գործունեություն էր իրականացնում, ինչն ավելի դժվարին վիճակի մեջ էր դնում իշխող կուսակցությանը: Քառյակի գործունեության հետեւանքով պարտադրվեց Տիգրան Սարգսյանի հրաժարականը»,- ասաց Լեւոն Զուրաբյանը:

Զուրաբյանը հիշեցրեց, որ Սահմանադրական բարեփոխումներից հետո ՀՅԴ-ն լքեց քառյակը, իսկ եռյակը սկսեց հանրահավաքներ կազմակերպել: Պատգամավորի խոսքով, սպասվում էր, որ հանրահավաքների միջոցով իշխանափոխության կհասնեն, սակայն, ԲՀԿ-ի հետ ունեցած մարտավարական տարաձայնությունների պատճառով ծրագիրն իրագործել չհաջողվեց. «Ռեժիմն էլ անցավ հակագրոհի, բռնությունների ենթարկվեցին քաղաքացիական ակտիվիստները, փետրվարի 15-ին որոշվեց, որ փետրվարի 20-ից անելու ենք շուրջօրյա հանրահավաքներ, սակայն ԲՀԿ-ի ղեկավարության եւ ակտիվիստների նկատմամբ  բռնությունների, ճնշումների եւ սպառնալիքներով շնորհիվ իշխանություններին հաջողվեց վիժեցնել շուրջօրյա հանրահավաքների ծրագիրը»:

Ապա Լեւոն Զուրաբյանը խոսեց Սահմանադրական բարեփոխումների մասին, երբ իրենք եռյակի պառակտվելուց հետո իրենք նոր քաղաքական ծրագիր մշակեց, որով «Ոչ»-ի շտաբ ստեղծեցին եւ դարձան համահանրապետական նախաձեռնություն:

Ամփոփելով խոսքը` Զուրաբյանը նշեց, որ այս տարիներին իրենք ունեցել են եւ լուրջ հաջողություններ, եւ դժվարություններ, բայց մի բան ակնհայտ է` ՀԱԿ-ը շարունակում է  հավատարիմ մնալ իր առաքելությանը, այն է՝ ձեւավորել առաջնային օրակարգը եւ ներգրավելով ժողովրդի լայն զանգվածներին՝ կառուցել անհրաժեշտ գործընթացը:

Ինչ վերաբերում է առաջիկա խորհրդարանական ընտրություններին, ՀԱԿ խմբակցության ղեկավարը հայտնեց, որ պետք է կարողանան ժողովրդին հասցնել այն գաղափարը, որ նոր Սահմանադրության պայմաններում ԱԺ ընտրություններն ավելի մեծ նշանակություն ունեն, քան նախագահական ընտրությունները: Լեւոն Զուրաբյանը լիահույս է` իրենց կհաջողվի քաղաքականացնել ԱԺ ընտրությունները, ինչպես դա արեցին միայնակ Սահմանադրական փոփոխությունների հանրաքվեն. «Պատմությունը ցույց տվեց, որ մենք շարունակում ենք մնալ միակ քաղաքական ուժը ՀԺԿ-ի հետ միասին, մենք ունակ ենք ասել ճշմարտությունը սեփական ժողովրդին` տեղծված իրավիճակի սթափ գնահատականներով: Բաց ճակատով դեպի հաղթանակ, որը կոփելու ենք միասին»,- հավելեց նա: