Գյումրիի 102–րդ ռազմաբազայի բարձրաստիճան պաշտոնյային մեղադրում են յուրացումների եւ պաշտոնական դիրքի չարաշահման մեջ

Դոնի Ռոստովում ավարտվել է գնդապետ Դենիս Զորինի գործի քննությունը, որը Հարավային Ռազմական օկրուգի սննդի մատակարարման ծառայությունում ղեկավար պաշտոններ էր զբաղեցնում։ Այս մասին գրում է «Կոմերսանտը»։ Նրան մեղադրում են խարդախության, պաշտոնական դիրքը չարաշահելու մեջ։ Հետաքննության վարկածի համաձայն՝ գնդապետը կապ է ունեցել Գյումրիում 102–րդ ռազմաբազայի զինծառայողների սննդամթերքի գնումների հետ կապված խարդախություններին։ Հասցված վնասի չափը գնահատվում է 470 մլն ռուբլի։  2016-ի հունիսին 7 տարվա ազատազրկման էր դատապարտվել Դենիս Զորինի ենթադրյալ հանցակից, 102-րդ բազայի սննդամթերքի մատակարարման ծառայության պետ Վլադիմիր Ֆիրսովը։

Աղբյուրների տվյալներով՝ Հարավային, իսկ հետո նաեւ Կենտրոնական ռազմական օկրուգների սննդամթերքի մատակարարման ծառայության նախկին ղեկավար գնդապետ Դենիս Զորինը անցյալ տարվա ամառվանից պահվում է Դոնի Ռոստովի քննչական մեկուսարանում, իսկ ներկայումս ծանոթանում է իր քրեական գործի նյութերին։ Այն հարուցվել էր ՌԴ ՔՕ 159-րդ հոդվածի 4–րդ մասի (հատկապես խոշոր չափի խարդախություն) եւ 285–րդ հոդվածի 3-րդ մասի (պաշտոնական դիրքի չարաշահում) մեղադրանքով։ Պաշտպանությունը մի քանի անգամ միջնորդություն է ներկայացրել գնդապետի խափանման միջոցը փոխելու համար, սակայն Դենիս Զորինը նախկինի պես կալանքի տակ է։

2016–ի հունիսի 8-ին Վլադիմիր Ֆիրսովը Ռոստովի կայազորային զինվորական դատարանի կողմից հատուկ կարգով դատապարտվել էր։ Մեղադրյալն ընդունել էր մեղքը եւ 7 տարվա ազատազրկման դատապարտվել։  Ցուցմունք տալիս Ֆիրսովը Զորինին նշել էր որպես հանցակից, որին ինքն իբր թե պարգեւատրումներ է հանձնել ֆիկտիվ ակտեր ստորագրելու համար։

Դենիս Զորինի փաստաբանը պնդում է, որ քննությունը Հարավային ռազմական օկրուգի Սննդամթերքի մատակարարման ծառայության նախկին պետի մեղավորության ոչ մի ապացույց չունի։ Պաշտպանող կողմի վարկածի համաձայն՝  քննիչները ելնում են բացառապես Վլադիմիր Ֆիրսովի ցուցմունքներից, որոնք մի քանի անգամ փոխվել են։ Սկզբում նախկին աշխատակիցը հայտնել է, որ մթերքն իբր թե ներկրվել է Հայաստան, իսկ ավելցուկը վաճառվել է տեղացի գործարարներին, սակայն հետո Ֆիրսովը հայտնել էր, որ  մթերքի դիմաց վճարման ապօրինի սխեման  ենթադրում էր միայն դրամական շրջանառություն հաշվեհամարներով, ինչի մասին ինքն իբր թե իմացել էր այդ սխեմայում ներգրավված տեղաբնակից, որին, սակայն, հարցաքննել չի հաջողվել, քանի որ նա մեկ տարի առաջ մահացել է։ Փաստաբանի միջնորդությունները մերժվել են։ Մեղադրական կողմի վարկածով՝ Հայաստանի բնակիչների մասնակցությամբ ՌԴ ՊՆ միջոցների յուրացման սխեման մշակել են անհայտ անձինք, իսկ Դենիս Զորինի դերը, քննության համաձայն, կայանում էր նրանում, որ նա քողարկում էր այդ յուրացումները։