«Թուրքական և ռուսական կողմերը թերացել են ռուս դեսպանի անվտանգությունն ապահովելու հարցում»

Թուրքագետ Գևորգ Պետրոսյանի կարծիքով՝ Թուրքիայում Ռուսաստանի դեսպան Անդրեյ Կառլովի սպանությունը, ըստ ամենայնի, ծայրահեղական, իսլամիստական խմբավորումների ձեռքի գործն է: Փորձագետը այդ եզրակացությանն է հանգում` ելնելով տարածված տեսանյութից և առկա տեղեկատվությունից:

Միաժամանակ, վերլուծելով Ռուսաստանի և Թուրքիայի ահաբեկչությունից հետո եղած առաջին հայտարարությունները, ակնհայտ է, որ երկու կողմերն էլ փորձում են այնպես անել, որ միջադեպը բացասական ազդեցություն չունենա իրենց հարաբերությունների վրա: Կողմերի հայտարարություններում նշվում է, որ կատարվածը պրովոկացիոն գործողություն էր, որը նպատակ ուներ վատթարացնել երկու երկրների հարաբերությունը: Սակայն դրան կողմնակից չէ ո՛չ Անկարան, և ո՛չ Մոսկվան: Այնպես որ կողմերը փորձելու են հարթել միջադեպը:

Իհարկե, շատ բան կախված է հետագա հետաքննությունից, որը կպարզի, թե ինչու և ինչպես իրականացվեց սպանությունը: Այն առավել հստակ ու տեսանելի կդարձնի պատկերը: Սակայն եղած փաստերը վերլուծելով և համադրելով, կարելի է միանշանակ փաստել, որ այդ միջադեպը երկու երկրների հարաբերությունների վրա էական ազդեցություն չի ունենա:

Իսկ հարցին, թե տվյալ ահաբեկչությունից կարող ենք եզրակացնել, որ Էրդողանը չի վերահսկում իրավիճակը երկրում, թուրքագետը պատասխանեց. «Իհարկե, ընդհանուր առմամբ կարող ենք ասել, որ տվյալ դեպքում թուրքական անվտանգության համակարգը ձախողվեց: Սակայն չի կարելի պնդել, որ դա վերաբերվում է նաև երկրի ընդհանուր իրավիճակին: Ես նման կտրուկ գնահատական չեմ տա:

Պարզապես թուրքական և ռուսական կողմը թերացել են ռուս դեսպանի անվտանգությունն ապահովելու հարցում»:

Գոհար Սարդարյան