Պետական պարտքը սրընթաց աճել է, սակայն ինքնանպատակ չի եղել. Ֆինանսների փոխնախարար

Մենք հատել ենք պետական պարտքի 5 մլրդ դոլարի հոբելյանական շեմն ու սրընթաց կանցնենք նաեւ 6, 7-ը: Այս մասին այսօր` դեկտեմբերի 22-ին, խորհրդարանում ասաց ԲՀԿ խմբակցության ղեկավար Նաիրա Զոհրաբյանը` անդրադառնալով 2016 թվականի նոյեմբերի 30-ին ստորագրված Հայաստանի Հանրապետության կառավարության եւ Զարգացման ֆրանսիական գործակալության միջեւ համապատասխան վարկային համաձայնագրին, որով 40 մլն եվրոյի վարկ է տրամադրվելու Կառավարությանը:

«Միգուցե մենք տարատեսակ աղյուսակներով նվազ կամ ոչ ռիսկային պարտքային բեռ ունեցող երկրների շարքում ենք, չնայած 5 մլրդ դոլարի հոբելյանական շեմն անցել ենք եւ սրընթաց անցնելու ենք նաեւ 6, 7-ը, սակայն մենք ունենք զրո ներդրումային միջավայր, եւ մեր տնտեսության քաղաքական հետագիծը, առաջնագիծը բացարձակ պոզիտիվ չէ: Բացի հռետորական հայտարարություններից` ոչինչ չի արվում կոնկրետ ներդրումների համար: Որեւէ տեսանելի հույս չկա, որ Հայաստանում հնարավոր են լուրջ ներդրւմներ, որոնք կբալանսավորեն տնտեսությունը: Պետք է աշխատել ներդրումների վրա, ոչ թե դեսպաններին ասել` գնացեք, տեսեք, թե ձեր շրջապատում ով կարող է ներդրում անել»,- ասաց Նաիրա Զոհրաբյանը` դիմելով հիմնական զեկուցող, ֆինանսների փոխնախարար Արմեն Հայրապետյանին:

Փոխնախարարը համաձայնվեց` այո, երկիրը ներդրումների կարիք ունի, պետական պարտքի մակարդակն էլ սրընթաց բարձրացել է, սակայն ինքնանպատակ չի բարձրացել:

«Տնտեսագիտության մեջ շատ կարեւոր կատեգորիա կա` մակրոտնտեսական հավասարակշռություն պետք է ապահովել երկրում, որ բոլոր տնտեսական երեւույթները փորձեն առաջ գնալ: Մենք երկու տարի արտաքին շոկ ենք ունեցել. Մի կողմից Ռուսաստանը, որի նկատմամբ սանկցիաներ էին կիրառվում, մյուս կողմից, պնղձի գներն են նվազել, այս արդյունքում պետք էր ներարկել որոշակի միջոցներ, որոնք էլ մենք արել ենք: Եթե միջազգային կազմակերպությունները մեր ծրագրերին եւ քայլերին չվստահեցին, վարկեր չէին տա»,- ասաց փոխնախարարը` հավելելով, որ Կառավարությունը վարկեր վերցնելիս զգուշավոր է շատ: