Ժողովրդին ոչ փոխհատուցումն է մխիթարում, ոչ՝«սուբսիդավորումը»

Գայանե Հովսեփյանը ֆեյսբուքյան իր էջում գրում է.

Եթե մինչեւ վերջերս հոսանքի թանկացման համար նախատեսվող «փոխհատուցում» բառի հետ օգտագործում էին «նպաստառուներին հատկացվող» բառակապակցությունը, ապա այն բանից հետո, երբ մարդիկ հանրահավաքների ժամանակ կամ հեռուստաեթերից ու համացանցից սկսեցին դժգոհել, որ կարիքավորներն իրականում շատ ավելին են, քան՝ «նպաստառու» կարգավիճակ ստացածները, եւ այդ պարագայում ինչո՞վ է մխիթարելու նրանց այդ փոխհատուցումը, այդ ժամանակ կառավարողներն սկսեցին փոքրիկ խորամանկություն բանեցնել. տարփողելով իրենց կողմից նախատեսված փոխհատուցումը / որին արդեն սկսեցին «սուբսիդիա» բառով մեծարել /, դրա կողքից «քշեցին» «նպաստառու» բառը, պարզապես՝ անորոշ ձեւով սկսեցին հայտարարել, թե ՀԷՑ-ի ճեղքվածքը կփոխհատուցվի «սուբսիդավորումով», իսկ հոսանքի էժանացում չի լինի» անշուշտ սա իսկական գլուխկոտրուկ  է յուրաքանչյուր առողջ բանականություն ունեցող մարդու համար. հոսանքը չի էժանանա, բայց՝ սուբսիդավորում կլինի / բնականաբար ՝ ոչ բոլորին, այլ՝ միմիայն «նպաստառու» խավին, որոնց ամսեկան նպաստներին կավելացվի 2000-ական դրամ, իսկ կարգավիճակ չունեցող խավերին տեխնիկապես էլ հնարավոր չէ «սուբիդավորել». անգամ չեն ասում՝ թոշակառուներին, պետական աշխատողների աշխատավարձերին սուբսիդավորում լինելու՞ է. ենթադրվում է՝ որ չի լինելու, այլապես գիտե՞ք ինչքան կտարփողեին... / :

Ու կառավարողների ու Բաղրամյան պողոտայում ցույց անողների միջեւ վեճն արդեն տեղափոխվեց այլ հարթություն. ինչի՞ հաշվին է լինելու չնչին «սուբսիդավորումը» ՝բյուջեի՞, թե՞ արտաբյուջետային միջոցների, իսկ դա արդեն շարքային քաղաքացուն ամենեւին չի մտահոգում, քանի որ այդ չնչին սուբսիդիան անգամ նրան կարող է չմխիթարել, եթե դրանից չի օգտվելու:Ու արդեն քանի օր է՝մոռացության է տրվել բանավիճող կողմերի միջեւ այն հարցը, որ ի՞նչ է անելու այն խավը, որ ոչ նպաստառու է, ոչ թոշակառու, ոչ աշխատող: Դրա համար էլ վանաձորյան հեռուստատեսությամբ թոշակառուները շատ զայրացած ելույթներ էին ունենում ՝ վարպապետի ելույթից հետո, եւ անգամ՝ անիծում կառավարողներին:Եվ քանի որ վարչապետին թվում է, թե ժողովուրդն ամբողջությամբ «կուտը կերել է» ու համոզված է, որ սուբսիդավորումը բոլորին է վերաբերվելու, զարմացած է, թե ինչու մարդիկ շարունակում են Բաղրամյանից չհեռանալ ու շարունակ «նվնվում են»:

Հասարակության մի մասն իսկապես չի հասկանում այս նրբությունները եւ համոզված է, որ «սուբսիդավորումը» բոլոր խավերին է վերաբերվելու, բայց գիտակից մարդկանց մոտ տրամաբանական հարց է առաջանում. եթե հոսանքի թանկացումն օգոստոսի մեկից ուժի մեջ կմտնի, ու այն փոփոխման ենթակա չէ՝ մինչեւ աուդիտի անցկացում, ապա ինչո՞վ է դա մխիթարելու ոչ նպաստառու խավերին:

Կամ, դիցուք՝ աուդիտից հետո, ամիսներ անց միայն պարզվեց, որ թանկացումն անհիմն է եղել, ու հավելյալ գումարները ՀԷՑ-ի սեփականատիրոջից բերեցին պետբյուջե, դրանից սպառողն ի՞նչ օգուտ ունի: Թեպետ՝ դատելով նրանից ՀԷՑ-ի գլխավոր սեփականատեր ռուսական ընկերության հայտարարությունից, հազիվ թե աուդիտ անողները «թալան» հայտնաբերեն ՀԷՑ-ում:

Սա համարժեք է նրան , որ ՏՄՊՊՀ-ն անհիմն թանկացման համար ինչ-որ մի ընկերության տուգանում է, բայց դրանից սպառողի մուծած հավելյալ գումարներն ամենեւին ետ չեն վերադարձվում, այլ միայն բյուջեն է շահում. կարճ ասած՝ ժողովրդի գրպանից դուրս եկածը կառավարության գրպանն է գնալու: Մի խոսքով՝ հերթական թանկացումը կոտրեցին ժողովրդի գլխին, բայց փորձում են աշխարհին համոզել, թե քաղաքացիների համար մտահոգ են ու այնպես կանեն, որ այդ թանկացումը քաղաքացին չզգա...

Ինչ խոսք, «դրսի» աշխարհում ոչ բոլորը չէ, որ այդ «կուտն» ուտում են ու հավատում հավաստիացումներին: