Լավ օրից չէ, որ որոշումներ են կայացվել ու ՀՀ բոլոր էներգետիկ հզորությունները ՌԴ-ի ձեռքում են. Ս.Նիկոյան

Tert.am-ը գրում է.

ԱԺ «Հանրապետական» խմբակցության անդամ Սամվել Նիկոյանը  Tert.am-ի հետ զրույցում նշեց, որ իր համար ևս ցանկալի է, որ ՀՀ  էներգետիկ բոլոր այդ հզորությունները գտնվեին մեր  պետության ձեռքում կամ այնպիսի ընկերությունների,  որոնք հայկական են, բայց նաև հավատացրեց, որ լավ օրից չէ, որ նման որոշումներ են կայացվել:

-Պարո՛ն Նիկոյան, ըստ Ձեզ՝ նախքան ՀԷՑ-ում աուդիտ անցկացնելու մասին հայտարարությունը , ՀՀ Նախագահը խորհրդակցել էր ՌԴ տրանսպորտի նախարարի հետ, հաջողվե՞ց ՀՀ իշխանությունների կողմից ռուսական իշխանություններին ուղերձ հղել, որ պարտավոր են Հայաստանում ավելի պատասխանատու սոցիալական քաղաքականություն վարել:

-Նախ ասեմ, որ ՀԷՑ-ը 2014-ին անցել է աուդիտ: ՀՀ Նախագահի՝ ցուցարարների պահանջին ընդառաջ, նաև այս առումով շեշտադրումներ եղան, որ հանրություն, եթե ուզում ես ավելի իրազեկված լինել, ապա, այո՛, ձեր պահանջով կարող ենք գնալ այս քայլին: ՀՀ ղեկավարի խոսքում, իհարկե, կարող էր պարունակվել նման պահանջ, որ շատ ավելի պատասխանատու քաղաքականություն վարեն այն ընկերությունները, որոնք Հայաստանում մոնոպոլ ճյուղերի սեփականատերեր են: Սա իմ կարծիքն է, իհարկե:

-Ձեր՝ որպես իշխող քաղաքական ուժի ներկայացուցչի, որպես այս ամենի ամփոփում, չեղա՞վ եզրահանգում, որ Հայաստանի էներգետիկ համակարգը չպետք է պատկանի օտար երկրի ընկերություններին:

- Չեմ  հասկանում, թե ինչու եք ընդգծում ՀՀԿ ներկայացուցիչ լինելու հանգամանքը, և հարցուպատասխանի կապը չհասկացա: Այսինքն՝ եթե ես չլինեմ կուսակցական, այդ հարցին չեմ կարող պատասխանե՞լ:

-Չէ, ուղղակի որպես իշխող մեծամասնության ներկայացուցիչ  նման եզրահանգման դեպքում ի տարբերություն մյուսների, կարող եք որոշակի բան փոխել:

-Ես կարծում եմ, որ մեր երկրի համար, եթե էներգետիկ բոլոր այդ հզորությունները գտնվեն պետության ձեռքում կամ այնպիսի ընկերությունների ձեռքում, որոնք հայկական են, շատ ավելի ցանկալի է, որովհետև բոլորս էլ տեսնում ենք, որ մեր էներգետիկ հզորությունները գտնվում են մեկ պետության ձեռքում: Վերջին քայլը իշխանությունների կողմից դա «Որոտանն» էր, որը էներգետիկ դիվերսիֆիկացիայի իմաստով առաջին քայլն էր (ամերիկացիներին վաճառքը ), որ կատարվեց: Ուղղակիորեն ես հիմա չեմ ուզում մտնել և փորձել քննադատել այն պաշտոնյաներին, որոնք ժամանակին վաճառել են..  Այսինքն՝ «ՀայՌուսգազարդը»՝ «Գազպրոմ Արմենիան» ամբողջովին ռուսական է, ՀԷՑ-ը, ՋէԿ-երը: Այլ խոսքով՝ ՀՀ բոլոր էներգետիկ հզորությունները: Կարծում եմ՝ լավ օրից չէ, որ նման որոշումներ են կայացվել:

-Իսկ այդ աուդիտի անցկացումը, Ձեր կարծիքով հասարակության կասկածները կցրի՞, եթե օրինակ պարզվի, որ 7 դրամ թանկացումը հիմնավորված է:

-Դա քայլ է, ձև է, մեթոդ է, որով  ևս մեկ աուդիտի անցկացումը հանրությանն ավելի թափանցիկ կներկայացվի: Սա փորձ է, հանրությունը կհավատա՞, չի հավատա… եթե կլինի արդեն երկու աուդիտի եզրահանգում, դա արդեն հասարակության խնդիրն է կամ մատուցման, քանի որ այն անդամները, որոնք հասարակության մեջ տեսակետներ են ձևավորում, նրանց կարելի է ներգրավել այս գործընթացին:

-Պարո՛ն Նիկոյան, սահմանադրական փոփոխությունների մասին վերջին տեղեկությունը, որ լինելու է 100 տոկոսանոց համամասնական ընտրակարգ և լինելու է համամասնական ցուցակի ռեյտինգային քվեարկություն: Ձեր կարծիքով՝ սա ի՞նչ նոր խոսք պետք է բերի ՀՀ քաղաքական դաշտ:

-Չէի ցանկանա այդ ուղղությամբ հստակ պատասխանել, որովհետև այդ փոփոխությունները քննարկման որոշակի փուլ չեն անցել:

-Իսկ այդքան  ասվում է՝ կուսակցությունների դերը բարձրացվի, ուղղահայաց կապերը վերանան, լինեն հորիզոնականները: Ինչու՞ նորանկախ Հայաստանի 20-25 –ամյա պատմության մեջ հանկարծ հասունացավ նման անհրաժեշտություն:

-Յուրաքանչյուր պետության մեջ իր ողջ պատմության ընթացքում կա այդ խնդիրը: Այն է՝ քաղաքական  համակարգ, որը գործում է անկախ և ազատորեն և գործում է քաղաքական տրամաբանության մեջ: Այդ խնդիրը կա բոլոր երկրներում՝ մեկում  ավելի շատ, մյուսում՝ ավելի քիչ, և միշտ այդ քաղաքական համակարգի զարգացման ուղղությամբ աշխատանքներ տարվում են: Մերը համեմատաբար երիտասարդ է՝ իր թերություններով հանդերձ և շատ բնական է, որ ձգտում ենք  ավելի զարգացնել, կատարելագործել: