Ինչով է պայմանավորված աշակերտների բացակայությունների մեծ թիվը

ՀՀ հանրակրթական դպրոցների 3-12-րդ դասարաններում երեկվանից վերսկսել է ուսումնական գործընթացը: Եղանակային անբարենպաստ պայմանների, նաև, ծնողների պնդմամբ՝ սուր շնչառական հիվանդությունների պատճառով դպրոցներում այս երկու օրերին  բացակայությունները շատ են:

Բացակայությունների պատճառների մասին խոսեցինք Երևանի Խաչատուր Աբովյանի անվան հ. 2 դպրոցի տնօրեն Իռա Հակոբյանի հետ: Նրա խոսքով՝ բացակայությունների պատճառը մամուլում տարածված` իրականությանը չհամապատասխանող տեղեկություններն են, թե դասերը հետաձգվում են. «Դե, մենք զանգահարում, ասում ենք, որ դասերը նորմալ ընթանում են: Բացի դա, երեկ երեխաները, ովքեր եկել էին դպրոց, տեսել են, որ դպրոցում տաք է, ու այսօր ավելի շատ աշակերտներ են եկել»:

Տնօրենի հավաստմամբ` այս պահին բացակայում է երեխաների 20-25 տոկոսը. «Բացակաների թվում նաև հիվանդ երեխաներ կան: Ծնողները զանգահարում և զգուշացնում են: Կան աշակերտներ, ովքեր քաղաքից դուրս էին գնացել ու դեռ չեն վերադարձել: Իսկ բացակայությունները դրվում են, բայց ոչ համատարած»:

Araratnews.am-ի հետ զրույցում տիկին Հակոբյանը նաև նշեց, որ  ԿԳ նախարարի հրահանգի համաձայն`  այսօրվանից դպրոցներում դասերը կսկսվեն ժամը 10-ին:

Ալեքսանդր Շիրվանզադեի անվան հ.21 դպրոցի տնօրեն Նելլի Երիցյանն էլ ընդգծեց, որ բացակայությունները հիմնականում ոչ թե սուր շնչառական հիվանդությունների, այլ ցրտի պատճառով են. «Մենք երկու մասնաշենք ունենք, գազով ենք ջեռուցում՝ ամենաբարձր ջերմաստիճանով, բայց դեռ այդքան էլ տաք չէ, երեխաները տաք հագնված են գալիս, դասերն էլ 30 րոպե են տևում: Իսկ բացակաները երեկ ավելի շատ էին, քան այսօր: Դասղեկներին հանձնարարվել է՝ զանգահարել ծնողներին: Մեծամասնությունը ոչ թե հիվանդությունների պատճառով է, այլ ծնողները մտավախություն ունեն, թե արձակուրդից հետո առաջին օրերին ցուրտ կլինի»:

Նելլի Երիցյանի խոսքով՝ 334 աշակերտներից երեկ բացակայել էին 150-ը, այսօր դպրոցում 80 բացակա կա: Իսկ բացակայությունները դրվում են:

ՀՀ առողջապահության նախարարության «Հիվանդությունների վերահսկման և կանխարգելման ազգային կենտրոնի» հատուկ վտանգավոր և օդակաթիլային վարակների բաժնի պետ Լիանա Թորոսյանից էլ տեղեկացանք, որ սուր շնչառական հիվանդությունների թիվը, նախորդ տարվա նույն ժամանակահատվածի համեմատությամբ, այս տարի կրկնակի նվազել է. «Բարդ դեպքեր՝ թոքաբորբի,  գրիպային բարդություններով ծայրահեղ ծանր հիվանդներ չկան, դեռևս հանրապետությունում շրջանառվում է գրիպի A տեսակի H3 ենթատեսակը»:

Լիանա Թորոսյանի հավաստմամբ՝ բուժհաստատություններում ամեն օր մշտադիտարկումներ են անցկացվում. «Մշտադիտարկումներ են անցկացվել նաև ամանորյա բոլոր օրերին: Վերլուծվել է պոլիկլինիկաների, հիվանդանոցների բաժանմունքների և շտապօգնության աշխատանքը, թվերը բավականին ցածր են»:

Մեր զրուցակցի պնդմամբ՝ գրիպով հիվանդների գերակշիռ մասը՝ գրեթե 80 տոկոսը, երեխաներ են, բայց դպրոցներում բացակայությունները պայմանավորված չեն գրիպային, սուր շնչառական վարակներով. «Մենք հետաքրքրվել ենք և տեղեկացված ենք, որ ծնողները հիմնականում ցրտի պատճառով երեխաներին չեն ուղարկում դպրոց: Շատ հեշտ է ամեն ինչ բարդել վարակի վրա, մինչդեռ պոլիկլինիկաների ներկայացրած պաշտոնական տվյալները ցածր են: Այսօրվա տվյալները դեռ չենք վերլուծել, բայց երեկվա դրությամբ ամբողջ հանրապետությունում ընդամենը 260 դիմելիություն է արձանագրվել»:

- See more at: http://araratnews.am/inchov-e-paymanavorvatc-ashakertneri-bacakayuthyunneri-metc-thiveh/#sthash.goe50XaA.dpuf