ԵԽԽՎ նախագահ Պեդրո Ագրամունտի նման պաշտոնյայի դեմ պայքարելը բավականին հեշտ է. Ստյոպա Սաֆարյան

ԵԽԽՎ նախագահ Պեդրո Ագրամունտին պաշտոնանկ անելու եւ հունվարյան նստաշրջանում նրա վերընտրությունը թույլ չտալու համար լուրջ պատճառներ կան: Այս մասին, NEWS.am-ի հետ զրույցում նշել է Միջազգային եւ անվտանգության հարցերի հայկական ինստիտուտի ղեկավար, քաղաքագետ Ստյոպա Սաֆարյանը, ով ժամանակին նույնպես եղել է ԵԽԽՎ-ում հայկական պատվիրակության կազմում:

Նրա խոսքով, քանի որ հայտնի «Խավիարային դիվանագիտություն» սկանդալային զեկույցում, Ադրբեջանի կողմից կոռուպցիոն ողջ սկանդալի մեջ ներգրավված է եղել նաեւ ԵԽԽՎ գործող նախագահ Պեդրո Ագրամունտը, նման պաշտոնյայի դեմ պայքարելը բավականին հեշտ է, հեշտ է փաստարկել, թե ինչու նրա վերընտրությունը չպետք է տեղի ունենա:

«Հիմա դա անելու շատ ձեւեր կան, նախ առաջին հերթին պետք է ուղղակի Եվրախորհրդում ունենալ լավ կապեր։ Ամեն մի պատգամավոր, կարծում եմ, կարող է իր խմբակցությունում դնել էդ խնդիրը, հատկապես խնդիր հարուցելով ԵԺԿ խմբակցությունում, որին հարում է Ագրամունտը: Մեծ ամոթ կլինի, եթե թույլ տրվի, որ Ագրամունտը ընտրվի, իսկ դա թույլ չտալու համար բավական մեծ հնարավորություններ կան: Մեր պատգամավորները պետք է ուղղակի գրագետ լոբբինգ տանեն. դա արդյունք տալիս է, էնպես չի, որ, ով խավիար է տալիս, նրա գործերն են հաջողվում։ Պետք է մեծ աղմուկ բարձրացնել, այնպիսի աղմուկ, որ ինքը ստիպված լիներ հետ կանգնել»,-ընդգծեց քաղաքագետը՝ հավելելով, որ ցավոք, Հայաստանի ԱԺ-ում այնպիսի մարդիկ են հավաքված, որ, մեծ մասամբ, խորհրդարանական պատվիրակությունների կարողությունները սահմանափակ են. «Մեր պատգամավորական կորպուսը եթե բավարար աշխատանք տաներ, ժամանակին կանխած կլիներ նաեւ Սարսանգի ջրամբարի վերաբերյալ բանաձեւի ընդունումը: Սա արդեն ցուցանիշ է, թե մենք ինչ կարող ենք անել, ինչ չենք կարող անել։ Ցավոք սրտի էս խորհրդարանում էնպիսի դեմքեր են հավաքվել, որոնք ի վիճակի չեն էդ աշխատանքը կատարել։ Ես չեմ ուզում բոլորին ասել, բայց մեծ մասամբ պատվիրակությունների կարողությունները սահմանափակ են»:

Նշենք, որ Եվրոպական կայունության նախաձեռնության (European Stability Initiative) կողմից հրապարակվել է «Խավիարային դիվանագիտություն» զեկույցի երկրորդ մասը. հետաքննությունում ներկայացված են Ադրբեջանի իշխանությունների կողմից կազմակերպված կոռուպցիոն սխեմաների բացահայտումները, որոնցում ներգրավված են եղել տասնյակ բարձրաստիճան եվրոպացի քաղաքական գործիչներ, այդ թվում՝ Պեդրո Ագրամունտը:

Ըստ այդմ, Միլանի դատախազության կողմից գործ է հարուցվել ԵԽԽՎ նախկին փոխնախագահ, ԵԽԽՎ-ում ԵԺԿ խմբի պատվավոր նախագահ Լուկա Վոլոնտեի դեմ, եւ այդ սկանդալում շոշափվում է նաեւ Պեդրո Ագրամունտի անունը: Վոլոնտեն համաձայնել է համագործակցել իրավական համակարգի հետ եւ տվել է խոստովանական ցումունքներ, որ Ադրբեջանի կողմից կոռուպցիոն ողջ սկանդալի մեջ ներգրավված է եղել նաեւ ԵԽԽՎ գործող նախագահ Պեդրո Ագրամունտը:

Նշենք, որ ըստ նախնական տեղեկությունների, ՀՀ-ում նախընտրական փուլի պատճառով ԵԽԽՎ առաջիկա նստաշրջանին չեն մասնակցելու ՀԱԿ-ի, ԲՀԿ-ի, ՕԵԿ-ի ու ՀՅԴ-ի ներկայացուցիչները: Հայկական պատվիրակությունից նստաշրջանին կմասնակցեն միայն ՀՀԿ-ի ներկայացուցիչները՝ պատվիրակության նախագահ Հերմինե Նաղդալյանը, Սամվել Ֆարմանյանը եւ Նաիրա Կարապետյանը: