Գեւորգ Սաֆարյանի դատավարությունը պարզապես պատվեր է. Ավետիք Իշխանյան

Ոստիկանի նկատմամբ բռնություն գործադրելու մեջ մեղադրվող` «Հիմնադիր խորհրդարանի» անդամ Գեւորգ Սաֆարյանին 2 տարվա ազատազրկման դատապարտելը պատվեր է ու չկա արդար դատավարության սկզբունք։ Այս մասին, այսօր՝ հունվարի 18-ին, «Գևորգ Սաֆարյանը դատապարտվեց 2 տարվա ազատազրկման. իրավապաշտպանների գնահատականը» թեմայով քննարկման ժամանակ նշել է Հայաստանի Հելսինկյան կոմիտեի նախագահ Ավետիք Իշխանյանը:

Նրա խոսքով, այս դատավարությամբ եւս մեկ անգամ ապացուցվեց Հայաստանի դատական համակարգի ձեւական լինելը։

«Այստեղ չկա արդար դատավարության սկզբունքը, սա պարզապես պատվեր է։ Եւս մեկ անգամ ապացուցվեց Հայաստանի դատական համակարգի ձեւական կառուցվածքը։ Էլ չեմ խոսում դատավորի մասին, ով իր պատվավոր պատմուճանը հագին նստել էր։ Գեւորգ Սաֆարյանը դասական խղճի քաղբանտարկյալ է, ոչինչ չի արել։ Սա մեր հերթական խայտառակությունն է։ Ես անհարմար եմ զգում նաեւ նրա համար, որ մեր քաղաքական ուժերն այդպիսին են։ Միայն Րաֆֆի Հովհաննիսյանը արձագանքեց ու աջակցեց նրան»,-ասաց նա։

Ավելի վաղ NEWS.am-ը հայտնել էր, որ ոստիկանի նկատմամբ բռնություն գործադրելու մեջ մեղադրվող` «Հիմնադիր խորհրդարանի» անդամ Գեւորգ Սաֆարյանին հունվարի 16–ին  Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանը մեղավոր է ճանաչել եւ դատապարտել 2 տարի ազատազրկման:

Հիշեցնենք, որ Երեւանի Ազատության հրապարակում 2016թ. հունվարի 1-ին ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Երեք անձ բերման էր ենթարկել, այդ թվում՝ Գեւորգ Սաֆարյանը, որին հետագայում էլ կալանավորեցին: Ըստ իրավապահ մարմինների` Գեւորգ Սաֆարյանը բռնություն է գործադրել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ: