Կրակոցներ Նոր Արեշում. անհայտ անձը ինքնաձիգով 10-ից ավելի կրակոցով սպանել է 57-ամյա տղամարդուն

Shamshyan.com-ը գրում է.

Այսօր` հուլիսի 6-ին, սապանություն է տեղի ունեցել Երևանում: ժամը 13:00-ի սահմաններում անհայտ անձը կամ անձինք Նոր Արեշ 28 փողոցում իրենց մոտ եղած հրազենով 10-ից ավելի անգամ կրակոցներ են արձակել նշված փողոցի թիվ 18/2 տան մոտ տեղադրած նստարանին նստած 57-ամյա Վաղինակ Ասոյանի վրա: Ինչպես դեպքի վայրից հայտնում է ֆոտոլրագրող Գագիկ Շամշյանը, վերջինս հիվանդանոցի ճանապարհին մահացել է:

Այս պահին դեպքի վայր են ժամանել ոստիկանության Երևան քաղաքի վարչության մեծ թվով աշխատակիցներ` վարչության պետ Աշոտ Կարապետյանի, պետի օպերգծով տեղակալ Արթուր Մեհրաբյանի գլխավորությամբ:

Ժամանել է նաև ոստիկանության Էրեբունու բաժնի օպերատիվ խումբը` էրեբունու ոստիկանապետ Գևորգ Հակոբյանի և ծառայության գծով տեղակալ Արմեն Գալստյանի գլխավորությամբ: Այս պահին նշված վայրում աշխատում են ոստիկանության փորձաքրեագիտական վարչության աշխատակիցները, ովքեր վարչության պետ Լորիկ Սաֆարյանի գլխավորությամբ սպանության վայրում հայտնաբերել և առգրավում են մեծ թվով պարկուճներ և գնդակներ:

Տեղում քննչական աշխատանքները ղեկավարում են Հայաստանի քննչական կոմիտեի Երևանի քննչական վարչության Էրեբունու քննչական բաժնի ավագ քննիչ Արման Աբրահամյանն ու նույն բաժնի պետի տեղակալ Բունիաթ Եղիազարյանը: Սպանության վայրում հայտնաբերվել է Mercedes մակնիշի 03 AV 033 համարանիշի ավտոմեքենա, որը, ըստ տեղեկությունների` պատկանում էր սպանվածին: Հավաքվածները ֆոտոլրագրողին ասում էին, որ սպանվածը 2 ամիս առաջ էր Բելգիայից վերադարձել Հայաստան:

Ֆոտոլրագրողի տեղեկություններով` փաստի առթիվ հարուցվել է քրեական գործ` ՀՀ քր. օր.-ի 104 և 235 հոդվածների հատկանիշներով: