Քաղաքական խառնաշփոթ

Անցած տարվա  վերջին , երբ նախընտրական գործընթացներն ու քաղաքական դաշտում վերախմբավորումները դեռևս գտնվում էին նախնական փուլում, հիմնականում կարծիքներ էին հնչում առ այն, թե Ամանորյա տոներից հետո հայաստանյան քաղաքական դաշտը շատ թե քիչ հստակ պատկեր կստանա։ Սակայն ինչպես տեսնում ենք, նախընտրական քարոզարշավի պաշտոնական մեկնարկից շուրջ մեկ ամիս առաջ, քաղաքական դաշտը ոչ միայն չի պարզաջրվում, այլև ընդհակառակը՝ ավելի է լղոզվում։

Այս գործընթացի գլխավոր «մեղավորներն» ներկայումս ձևավորված կամ ձևավորման փուլի մեջ գտնվող դաշիքններն են, որոնք միավորել են իրար հակասող և միմյանց հետ որևէ աղերս չունեցող քաղաքական ուժերին ու գործիչներին։ Սա ըստ էության վկայում է հայաստանյան քաղաքական իրականության մեջ գործող ապաքաղաքագիտական կամ իռացիոնալ  զարգացումների մասին, որտեղ քաղաքական ուժերն ու գործիչները հանդես են գալիս ոչ թե որպես քաղաքական սուբյեկտներ, այլ ընդամենը տարատեսակ ամբիցիաներ և շահեր հետապնդող անհատներ կամ խմբավորումներ։

Թե ինչ հետևանք կունենա ապրիլի 2-ից հետո  հայաստանյան քաղաքական դաշտի առկա պատկերի արտատպումը Ազգային ժողովում, դժվար է ասել։ Սակայն ակնհայտ է, որ նման զարգացման պայմաններում կարող ենք արդեն փաստել, որ մենք կունենանք ձախողված Ազգային ժողովը, որը չափազանց հեռու կլինի խորհրդարանական կառավարման մոդելի պայմաններում պառլամենտական լավագույն ավանդույթներ սաղմնավորելուց և զարգացնելուց։

Բնականաբար քաղաքական դաշտում առկա խառնաշփոթն ավելի է խորացնում արդեն հաստատված այն տեղեկությունը, որ Հանրապետական կուսակցության փոխնախագահ և նախկին վարչապետ Հովիկ Աբրահամյանը հեռանում է իր հարազատ կուսացությունից։ Սա արդեն իսկ վկայում է այն մասին, որ ներկայումս երկրի քաղաքական իրականության մեջ ընթացող վերաձրակերպումներն ու վերախմբավորումները չեն շրջանցել նաև իշխանության կուսակցությանը, որի ներսում մշտապես էլ եղել են հակասություններ, որոնք սակայն միառժամանակ մանում էին կառաարելիության սահմաններում։

Անշուտ, Հանրապետականը ամեն կերպ հայտարարելու է, որ Աբրահամյանի հեռանալը անձնական որոշում է, և դա էական ազդեցություն չի ունենա Հանրապետականի ծրագրերի և նպատակների վրա, սակայն ակնհայտ է նաև, որ կուսակցության առանցքային դեմքի հեռանալը կուսակցությունից և ավելին Աբրահամյանի հնարավոր անդամակցությունը ներկայումս առկա այս կամ այն քաղաքական միավորմանը ինքին բավական դժվար կացության մեջ կդնի հանրապետականին։ Վերջիվերջո որևէ մեկի համար գաղտնիք չէ, որ Աբրահամյանը տիրապետում է բավական լուրջ ռեսուրսների, որոնք տարիներ շարունակ ծառայեցրել է հենց ՀՀԿ-ի և բնականաբար նաև իր շահերին։

Ինչևէ, Աբրահամյանը ամենայն հավանականությամբ մոտ օրերս հանդես կգա համապատասխան հայտարարությամբ, թե ինչքանով այդ հայտարարությունը լույս կսփռի հայաստանյան քաղաքական դաշտի հետագա վերաձևակերպումների ուղղությունների վրա, պարզ կդառնա ամենամոտ ապագայում։ Իսկ մինչ այդ զինվենք համբերությամբ։

Աղասի Մարգարյան

PressMedia.am վերլուծաբան