Վանաձորցի ծննդկանի մահվան գործով կհարցաքննվեն նրա հետ հիվանդանոցում եղած հիվանդները

«Վանաձոր բժշկական կենտրոնում» մահացած 32-ամյա ծննդկան Հռիփսիմե Նազլուխանյանի մահվան դեպքով հարուցված քրեական գործի շրջանակում կհարցաքննվեն այն հիվանդները, որոնք նրա հետ եղել են նույն հիվանդասենյակում: Այս մասին NEWS.am-ի հետ զրույցում ասաց Հռիփսիմե Նազլուխանյանի իրավահաջորդի ներկայացուցիչ Անի Չատինյանը` նշելով, որ նախաքննակամ մարմինը բավարարել է հիվանդներին հարցաքննելու վերաբերյալ իր միջնորդությունը:

ՀՀ քննչական կոմիտեի Լոռու մարզային քննչական վարչությունում քննվող քրեական գործով պարզվել է «Վանաձոր բժշկական կենտրոնում» 32-ամյա ծննդկանի մահվան պատճառը, այն է ՝ հեմոռագիկ շոկ՝ պայմանավորված ներքին օրգանների եւ անոթների սուր արյունապակասության հետ։

Նոյեմբերի 29-ին վարույթն իրականացնող մարմինը ստացել է դատաբժշկական փորձաքննության եզրակացությունը։ Ըստ այդմ՝ փորձագետները կնոջ մոտ ախտորոշել են ծննդաբերական պատռվածք, արտաքին սուր արյունահոսություն, ներքին օրգանների եւ անոթների սուր արյունապակասություն։

Հիշեցնենք, որ Վանաձորի ծննդատանը հոկտեմբերի 17-ի լույս 18-ի գիշերը մահացել էր ծննդկան 32-ամյա Հռիփսիմե Նազլուխանյանը: Նրա հարազատներն ավելի ուշ NEWS.am-ին հայտնել էին, որ կատարվածի մեջ մեղադրում են բժիշկներին: Մասնավորապես սկեսուրը` Քնարիկ Մնացականյանը, նշել էր, որ դեռեւս 21 օր առաջ բժիշկները զննելուց հետո որոշել են Հռիփսիմեին վերցնել հսկողության տակ ու պառկեցնել ստացիոնար հսկողության, սակայն, ծննդկանը ծննդաբերելուց ժամեր անց մահացել է՝ բժիշկների անտարբերության պատճառով:

Վանաձորի բժշկական կենտրոնի մանկաբարձագինեկոլոգիական բաժանմունքի վարիչի ժամանակավոր պաշտոնակատար Դավիթ Շահվերդյանն էլ մեզ հետ զրույցում դժվարացել էր պատասխանել՝  ո՞րը կարող էր լինել մահացած ծննդականի մոտ առաջացած արյունահոսության պատճառը, նա հորդորել էր սպասել  դատաբժշկական փորձաքննության պատասխանին: