Հայ դատի հանձնախումբը մտահոգված է Սպիտակ տան՝ ներգաղթային քաղաքականության մասին հրամանի առնչությամբ

Ամերիկայի Հայ դատի հանձնախումբը հայտարարություն է տարածել  կապված Սպիտակ տան՝ ԱՄՆ օտարերկրյա ահաբեկիչների մուտքը թույլ չտալու հրամանագրի հետ:

Հայ դատի Ամերիկայի հանձնախումբը հայտարարել է, որ շարունակում է մտահոգված մնալ այդ հրամանագրի առնչությամբ՝ ինչպես ԱՄՆ-ի քաղաքականության, այնպես էլ հայերի եւ նրանց ընտանիքների վրա այդ հրամանի թողած հետեւանքների առումով։

Նշվում է, որ տվյալ հրամանով ԱՄՆ մուտքի սահմանափակումներ են մտցվում Սիրիայի, Իրաքի, Իրանի, Լիբիայի, Եմենի, Սոմալիի եւ Սուդանի քաղաքացիների համար: Ընդ որում, 90-օրյա այդ արգելքը  հետագայում կարող է դառնալ մշտական:

Հայտարարությունում նշվում է, որ դեռ պարզ չէ, թե ինչ ինչ ազդեցություն կարող է դա ունենալ ԱՄՆ քաղաքացի չհանդիսացողների վրա: Օտարեկրյա քաղաքացիների եւ նրանց ընտանիքների վրա կարող է ազդել նաեւ այդ խնդրի առնչությամբ ԱՄՆ Կոնգրեսի եւ դատական ատյանների որոշումները:

Հայ Դատի հանձնախումբը նշել է, որ շարունակում է աշխատանքը համապատասխան կողմերի՝ այդ թվում Կոնգրեսի եւ Սպիտակ տան հետ եւ այդ առնչությամբ մի քանի առաջարկներ է անում:

Նախ Հանձնախումբը խորհուրդ է տվել հայերին, որոնց բարեկամները կամ ընկերները ձերբակալվել են ԱՄՆ մուտք գործելիս, կամ ում թույլ չեն տվել վերադառնալ ԱՄՆ՝ կապվել իրենց հետ:

Հանձնախումբը խորհուրդ է տալիս Իրանի, Իրաքի, Լիբիայի, Սոմալիի, Սուդանի, Սիրիայի եւ Եմենի հայերին, որոնք ԱՄՆ քաղաքացիներ չեն, ձեռնպահ մնալ ԱՄՆ տարածքը լքելուց, քանի որ նրանց հնարավոր է, թույլ չտան վերադառնալ երկիր՝ անկախ իրենց իմիգրացիոն կարգավիճակից:

Հանձնախումբը խնդրի առնչությամբ պարբերաբար խորհրդակցություններ է անցկացնում տարբեր իրավապաշտպան հասարակական կազմակերպությունների հետ:

«Որպես հայկական ծագումով ամերիկացիներ՝ հպարտ ներգաղթյալների համայնք, որոնցից շատերը Սիրիայում, Իրաքում, Իրանում եւ այլ երկրներում արմատներ ունեցող Հայոց ցեղասպանությունը վերապրածների ընտանիքներից են, մենք շարունակում ենք խորապես մտահոգված մնալ այս նոր սահմանափակումների բարոյական, իրավական եւ մարդասիրական հետեւանքների հետ կապված:

Մենք ակտիվորեն կգործենք եւ կպաշտպանենք մարդու, այդ թվում հայերի իրավունքները, որոնք տուժել են այս հրամանագրի հետեւանքով: Մեր առաքելությանը համապատասխան, մենք կպահպանենք զգոնությունը մեր հասարակության բարեկեցության պաշտպանության եւ ուժեղ սփյուռքի ընդհանուր շահերի առաջխաղացման հարցում»,-ասված է հայտարարությունում: