ԿԽՄԿ ներկայացուցիչներն այցելել են Շահբազ Գուլիեւին եւ Դիլհամ Ասքերովին

Կարմիր խաչի միջազգային կոմիտեի ներկայացուցիչները հունվարի 24-ին Լեռնային Ղարաբաղում հերթական անգամ այցելել են ադրբեջանցի 2 դատապարտյալներին եւ նրանց հնարավորություն են տվել հարազատների հետ ընտանեկան բնույթի նորություններ փոխանակել: Այս մասին ի պատասխան NEWS.am-ի հարցմանը հայտնեց Լեռնային Ղարաբաղում ԿԽՄԿ մամուլի ծառայության ներկայացուցիչ Էթերի Մուսայելյանը:

«Լեռնային Ղարաբաղում Կարմիր խաչի միջազգային կոմիտեն հերթական անգամ այցելեց դատապարտված երկու ադրբեջանցիներին եւ նրանց հնարավորություն տվեց հարազատների հետ ընտանեկան բնույթի տեղեկություններ փոխանակել: Իր մանդատի համաձայն՝ ԿԽՄԿ-ն դատապարտյալներին այցելում է նրանց պահման պայմանների, նրանց հանդեպ վերաբերմունքի մոնիթորինգ անցկացնելու նպատակով, նաեւ այն նպատակով, որ նրանք հարազատների հետ կապ պահպանելու հնարավորություն ունենան»,- նշեց Էթերի Մուսայելյանը:

Հիշեցնենք, որ Ադրբեջանի քաղաքացիներ Շահբազ Գուլիեւը (1968թ. ծնված), Դիլհամ Ասկերովը (1960թ. ծնված), ինչպես նաեւ սպանված երրորդ մասնակից Հասան Հասանովը, ունենալով զենք եւ զինամթերք, 2014թ. հունիսի 29-ին ապօրինաբար հատել էին ԼՂՀ պետական սահմանը  եւ ներխուժել Հանրապետության Շահումյանի շրջանի տարածք՝ հետախուզական գործողությունների նպատակով:  

Տվյալ անձինք հատուկ առաջադրանքով տեղեկություններ էին հավաքել եւ լրտեսական գործունեություն իրականացրել: Ավելին, նրանք զենքի գործադրմամբ հուլիսի 4-ին առեւանգել էին ԼՂՀ անչափահաս քաղաքացի Սմբատ Ցականյանին, որի մարմինը հրազենային վնասվածքներով հայտնաբերվել էր հուլիսի 15-ին Քարվաճառ եւ Մանաշիդ համայնքների միջեւ ընկած անտառային զանգվածում: Բացի այդ, Հասանովը հուլիսի 11-ի երեկոյան Վարդենիս-Քարվաճառ ճանապարհի 32-րդ կմ-ին ազգային ատելության հողի վրա հրազենով սպանել էր Երեւանի բնակիչ Սարգիս Աբրահամյանին (1971թ. ծնված), իսկ Կոտայքի մարզի Ձորաղբյուր գյուղի բնակիչ Կարինե Դավթյանին հրազենային վնասվածքներ էր հասցրել: Նա զինված դիմադրություն էր ցույց տվել ձերբակալման ժամանակ եւ վնասազերծվել:

Նշենք, որ ԼՂՀ ընդհանուր իրավասության առաջին ատյանի դատարանի վճռով Դիլհամ Ասկերովը դատապարտվել է ցմահ, իսկ Գուլիեւն էլ՝ 22 տարվա ազատազրկման: