Նալբանդյան. ԵԱՀԿ-ի երեւանյան գրասենյակի պատմությամբ Ադրբեջանն իրեն անհեթեթ վիճակում դրեց

ԵԱՀԿ-ի երեւանյան գրասենյակի գործունեությունը սահմանափակելու փորձերը հանգեցրին նրա, որ Ադրբեջանն իրեն հակադրեց կազմակերպությանը եւ հայտնվեց միանգամայն ահեթեթ վիճակում: Այս մասին հունվարի 31-ին՝ 2016-ի ամփոփիչ մամուլի ասուլիսում ասաց ԱԳ նախարար Էդվարդ Նալբանդյանը:

Նախարարի խոսքով՝ իր վերջին այցը Վիեննա եւ ԵԱՀԿ-ի գործող նախագահի ու գլխավոր քարտուղարի հետ հանդիպումները կապված էին այս հարցի լուծման հետ: «Վիեննա այցը տեղի է ունեցել մեր նախաձեռնությամբ, հանդիպումներն անցել են փոխըմբռնման մթնոլորտում»,- հավաստիացրեց ԱԳ նախարարը:

Նա  հայտնեց, որ Ավստրիայի նախագահությամբ Մշտական խորհրդի նիստի ժամանակ հայտարարվել է, որ մի երկիրը (ենթադրվում է՝ Ադրբեջանը) մտահոգություն է հայտնել, որ ԵԱՀԿ-ի երեւանյան գրասենյակը զբաղված է իր մանդատին չհամապատասխանող գործունեությամբ: «Հարցը ականազերծման ծրագրին է վերաբերում: Իրականում դա ոչ թե ականազերծման ծրագիր է, այլ ուսուցողական, որը ոչ մեծ ծրագիր է: Խոսքը տրենինգի մասին է, այլ ոչ թե ականազերծման: ԵԱՀԿ-ը ստիպված էր տարածաշրջան առաքելություն ուղարկել, որից հետո հաշվետվություն ներկայացվեց, որ հայտարարություններն իրականությանը չեն համապատասխանում: Չնայած դրան, Ադրբեջանը շարունակեց համառել եւ հեռու գնաց՝ հայտարարելով, որ գրասենյակը չպետք է զբաղվի «Ադրբեջանի շահերը խախտող» գործունեությամբ: Այսինքն՝ 17 տարի ամեն ինչ լավ էր, եւ հանկարծ «շահերի դեմ սպառնալիքներ» հայտնվեցին: Այսինքն՝ Ադրբեջանը ԵԱՀԿ-ի դեմ դեմարշ նախաձեռնեց՝ մեղադրելով անվտանգությանն սպառնալու մեջ:

Նախ՝ դա այդպես չէ, ինչի մասին ասել է դեռեւս անցյալ տարի նախագահող Գերմանիան: Արդյունքում՝ առաջարկվել է ձեռնպահ մնալ ծրագրի իրականացումից, որը մենք չենք առաջարկել: Մենք չենք առարկել: ԵԱՀԿ-ը բարձր գնահատեց Հայաստանի կառուցողական մոտեցումը»,- նշեց ԱԳ նախարարը:

Նա հիշեցրեց, որ Հայաստանում ԵԱՀԿ-ի գրասենյակը տարածաշրջանում միակ լիարժեք գործող գրասենյակն է, Ադրբեջանում նրա իրավասությունները վաղուց սահմանափակված են: «Եվ ստացվում էր, որ Հայաստանին միշտ օրինակ էին բերում: Իրավիճակը փոխելու փորձը հանգեցրեց ադրբեջանական կողմի խայտառակ վիճակին: Շատ երկրներ աջակցեցին ԵԱՀԿ-ի երեւանյան գրասենյակի ծրագրին, որից հետո Ադրբեջանը հայտարարեց, որ այն որպես սպառնալիք կդիտարկի»,- նշեց նախարարը: