Ստեղծվելու է ՀՀ- Շվեյցարիա օդային ուղիղ կապ

Վարչապետ Կարեն Կարապետյանն այսօր ընդունել է Հայաստանի Հանրապետությունում Շվեյցարիայի Համադաշնության արտակարգ եւ լիազոր դեսպան Լուկաս Գասերին:

Վարչապետը նշել է, որ այս տարի լրանում է Հայաստանի եւ Շվեյցարիայի միջեւ դիվանագիտական հարաբե¬րությունների հաստատման 25-ամյակը, որոնք կարելի է բնորոշել՝  բարձր մակարդակի կայուն հարաբերություններ: «Մենք կարեւորում ենք Շվեյցարիայի հետ համագործակցությունը եւ հետաքրքրված ենք բոլոր բնագավառներում դրա հետագա զարգացմամբ»,-ասել է Կարեն Կարապետյանը: Միեւնույն ժամանակ կառավարության ղեկավարն անհրաժեշտ է համարել առեւտրատնտեսական կապերի աշխուժացումը՝ նշելով, որ այդ ոլորտում չօգտագործված մեծ ներուժ կա: Համագործակցության խթանման եւ գործարար շփումների ակտիվացման նպատակով վարչապետը կարեւորել է օդային ուղիղ կապերի հաստատումը, ինչպես նաեւ այն հանգամանքը, որ Հայաստանն օգտվում է Շվեյցարիայի կողմից տրամադրվող Արտոնությունների ընդհանրացված համակարգի (GSP) արտոնյալ ռեժիմից:

Ընդգծելով, որ երկու երկրներն ունեն երկարամյա սերտ քաղաքական հարաբերություններ՝ դեսպան Գասերը համակարծիք է եղել, որ տնտեսական համագործակցության ներուժն ավելին է, քան օգտագործվում է, եւ Շվեյցարիան եւս կարեւորում է երկկողմ տնտեսական կապերի խորացումը: Նա նշել է, որ Հայաստանի տարածաշրջանների զարգացման, կրթության, գիտության, մշակույթի ոլորտներում ձեւավորվել է արդյունավետ գործակցություն, իսկ հումանիտար ոլորտում հայ-շվեյցարական սերտ գործընկերության ձեռքբերումներից է այն, որ Շվեյցարիայի կառավարությունը պաշտոնապես հայտարարել է հաջորդ տարի Ֆրանկոֆոնիայի գագաթնաժողովը Հայաստանում անցկացնելու մասին: Լուկաս Գասերը ողջունել է վարչապետի՝ երկու երկրների միջեւ օդային ուղիղ հաղորդակցություն հաստատելու առաջարկությունը եւ գործընթացը սկսելու հարցում աջակցության պատրաստակամություն հայտնել :

Վարչապետ Կարեն Կարապետյանը եւ դեսպան Գասերը  մտքեր են փոխանակել գյուղատնտեսության, զբոսաշրջության, տեղեկատվական տեխնոլոգիաների, այլընտրան¬քային էներգետիկայի, դեղագործության ոլորտներում համագործակցության հեռանկարների շուրջ:

Վարչապետը նաեւ շնորհակալություն է հայտնել Շվեյցարիայի զարգացման եւ համագործակցության գործակալության (SDC) աջակցության ծրագրերի համար, որոնք նպաստում են Հայաստանի հեռավոր մարզերի տնտեսության զարգացմանը: