Ծաղկաձորի ճոպանուղին շահագործվում է տեխնիկական անվտանգության կանոնների խախտումներով. Տեխանվտանգության ազգային կենտրոն

Ծաղկաձորի ճոպանուղին շահագործվում է տեխնիկական անվտանգության օրենսդրության պահանջների կոպտագույն խախտումներով։ Այս մասին այսօր՝ փետրվարի 3-ին, NEWS.am-ի հետ զրույցում ասաց ԱԻՆ Տեխնիկական անվտանգության ազգային կենտրոնի շարժասանդուղքների , վերելակների եւ ճոպանուղիների տեխնիկական անվտանգության փորձաքննության բաժնի պետ Լուսինե Հովհաննիսյանը: Նա նշեց, որ Ծաղկաձորի ճոպանուղին պարտավոր էր գրանցվել Արտադրական վտանգավոր օբյեկտների ռեեստրում, որը  չի արվել:

«Տեխնիկական անվտանգության ապահովման պետական կարգավորման մասին» ՀՀ օրենքի եւ ոլորտը կարգավորող այլ իրավական ակտերի համաձայն ՀՀ տարածքում շահագործվող յուրաքանչյուր արտադրական վտանգավոր օբյեկտ պարտավոր է գրանցվել ԱՎՕ-ների ռեեստրում եւ տարեկան առնվազն մեկ անգամ ենթարկվել տեխնիկական անվտանգության փորձաքննության։ Մեր կենտրոնը 2006թ. է գործում եւ այդ ճոպանուղու շահագործողը չնայած մեր բազմաթիվ հորդորներին անտեսում է մեր պահանջները»,-ասաց նա:

Լուսինե Հովհաննիսյանը նշեց, որ «Տեխնիկական անվտանգության ապահովման պետական կարգավորման մասին» ՀՀ օրենքի եւ ոլորտը կարգավորող այլ իրավական ակտերի համաձայն, արտադրական այն օբյեկտները, որոնք անտեսում են օրենքի պահանջները, ենթարկվում են տուգանքների:

«Թե չգրանցվելու, թե փորձաքննության չենթարկվելու համար այդ օրենքով տուգանք է նախատեսված: Բայց հստակ կարող եմ ասել, որ իրենք երբեւէ չեն տուգանվել, իսկ տուգանքների մասով պատասխանատու է Պետական, հրդեհային եւ տեխնիկական անվտանգության տեսչությունը»,-ասաց նա: