ՕԵԿ-ի վերածնունդը ձախողվում է

Հայաստանյան քաղաքական կյանքում աննախադեպ քաղաքական միավորման ներսում ( աննախադեպ գնահատականը պատկանում է օեկ-հվկ-ականներին), մթնոլորտը գաղջացել է։ Այս գնահատականը նույնպես  մերը չէ այլ ՀՎԿ հիմնադիր անդամներից Դավիթ Հարությունյանինը, որը նախկինում Լիբերալ-ժողովրդավարական կուսակցության նախագահն էր, ապա ՀՎԿ հիմնադիրներից մեկն ու Հայկական վերածնունդ կուսակցության երիտասարդական թևի հիմնադիրը։ Վերջինս հանդես է եկել հայտարարությամբ և հայտնել ՀՎԿ-ից իր հեռանալու մասին՝ մասնավորապես ասելով, թե կուսակցության ներսում տիրում է խաբեության և գաղջ մթնոլորտ։

Փաստորեն կարող ենք արձանագրել, որ տասնյակ զավեշտալի ու հանրությանը անհայտ կուսակցություններից ու հասարակական կազմակերպություններից կազմված և ՕԵԿ-ից վերածնված Հայկական վերածնունդն այդպես էլ չի կարողանում վերածնվել։

Մինչ այս էլ Հայկանդուխտ կուսակցության նախագահ Արմենուհի Ղազարյանն էր հեռացել ՀՎԿ-ից  և ներկայումս էլ դիմել է դատարան՝ ՀՎԿ գրանցումը չեղյալ ճանաչելու հայցով։

Դավիթ Հարությունյանի հեռանալը ՀՎԿ-ից,  կուսակցությունը, մեղմ ասած,  շատ տարօրինակ է մեկնաբանում՝ հաղորդագրություն տարածելով, թե իրենք պատրաստվում էին հեռացնել Հարությունյանին իրենց շարքերից, սակայն վերջինս մի քայլ առաջ է ընկել իրենցից և ավելի շուտ դուրս եկել։

Թե ինչքանով են նմանատիպ հայտարարություններն ու մեկնաբանությունները քաղաքական և ինչ-որ տեղ կոռեկտ, դժվար է ասել և ինչ-որ տեղ մեր գործն էլ չէ, առավել ևս, երբ դրանք վերաբերում են այնպիսի քաղաքական ճանապարհ անցած քաղաքական ուժին ինչպիսին ՕԵԿ-ն է, որի պիտակից այդպես էլ չի կարողանում ազատվել Հայկական վերածնունդը։

 Պարզապես պետք է փաստել, որ ընտրությունների նախօրեին արդեն իսկ սկսել են հօդս ծնդել Արթուր Բաղդասարյանի և օեկականների տարատեսակ խոստումները, որոնք տրվել են Հայկական վերածնունդ միավորումն ստեղծելու ընթացքում։

Ամենայն հավանականությամբ Հայկական վերածնունդի մեջ միավորվող տարատեսակ խմբերը հույսեր են ունեցել կամ գուցե և ուղղակի հավաստիացումներ են ստացել, որ առաջիկա խորհրդարանական ընտրություններում ցուցակի անցողիկ տեղերում կարող կլինեն, սակայն պարզվում է, որ այդ տեղերը սահմանափակ են, իսկ խոստումները չափից ավելի շատ։ Ուստի սկսվել է արտահոսքը։

Ի դեպ անշուշտ, կարող են հարցեր հնչել, որ մանդատը էական չի եղել Հայական վերածնունդին միանալու համար, այլ կարևորվել են ՕԵԿ-ի գաղափարականությունն ու առավել ևս սկզբունքայնությունը, սակայն այստեղ մի շատ հակասական վիճակ կարող է առաջանալ, քանի որ իր գոյության ընթացքում ՕԵԿ-ը դժվար է ասել նույնիսկ, թե քանի անգամ է փոխել իր քաղաքական կողմնորոշումները, սակայն սա նույնպես կուսակցության ներքին գործոն ու որոշելիքն է։

Իսկ քաղաքական առումով, թերևս Հայկական վերածնունդը հիմնելիս, Բաղդասարյան Արթուրը հույս ուներ դրանով լցնել Գագիկ Ծառուկյանի հեռանալուց հետո քաղաքական դաշտում առաջացած բացը, սակայն Ծառուկյանը վերադարձավ և ոչ միայն ՀՎԿ-ի ու Արթուր Բաղդասարյանի, այլև այդօրինակ բոլոր ուժերի հույսերն ի դերև ելան, ինչի արդյունքում էլ ՀՎԿ-ից սկսվել է առնետավազքը։

Աղասի Մարգարյան