Հայաստանում առկա է արդյունաբերական եւ արտահանման լուրջ ներուժ. Ֆարուխ Ալիմջանով

Հայաստանում առկա է արդյունաբերական եւ արտահանման լուրջ ներուժ: Այս մասին, այսօր՝ փետրվարի 15-ին, ՀՀ տնտեսական զարգացման եւ ներդրումների նախարար Սուրեն Կարայանի հետ հանդիպման ժամանակ նշել է ՄԱԿ-ի արդյունաբերական զարգացման կազմակերպության (ՄԱԱԶԿ/UNIDO) Առեւտրի, ներդրումների եւ նորարարության վարչության գործարար միջավայրի եւ նորարարության բաժանմունքի փորձագետ Ֆարուխ Ալիմջանովը:

Նախարարությունից NEWS.am-ին հայտնում են, որ ոողջունելով հյուրերին` Սուրեն Կարայանը գոհունակություն է հայտնել ՄԱԱԶԿ աջակցությամբ իրականացված աշխատանքների արդյունքների վերաբերյալ: Նախարարն իր խոսքում նշել է. «Նախօրեին տեղի ունեցավ ՄԱԱԶԿ «Հայաստանի արտահանման ուղղվածություն ունեցող ճյուղերի մրցունակության բարձրացում արդիականացման եւ շուկան մատչելի դարձնելու միջոցով» ծրագրի երկրորդ փուլի շնորհանդեսը: ՀՀ կառավարությունը կարեւորում է այս ծրագրի դերը, քանի որ այն հնարավորություն է տալիս համագործակցել ոչ միայն թեթեւ արդյունաբերության ոլորտում, այլեւ զուգորդվում է նոր աշխատատեղերի ստեղծմամբ եւ արտահանման ծավալների աճով, ինչը խթանում է մեր երկրի տնտեսության զարգացմանը»:

ՄԱԿ-ի արդյունաբերական զարգացման կազմակերպության ՄԱԱԶԿ փորձագետ Ֆարուխ Ալիմջանովն իր հերթին շնորհակալություն է հայտնել նախարար Կարայանին ընդունելության համար եւ նշել, որ իրենց աշխատանքը արդյունավետ չէր լինի առանց հայկական կողմի` մասնավորապես ՀՀ տնտեսական զարգացման եւ ներդրումների նախարարության նեգրավվածության: Ֆարուխ Ալիմջանովը խոսել է Հայաստանում թեթեւ արդյունաբերության ոլորտում գործունեություն ծավալող կազմակերպությունների հաջողված փորձի մասին եւ հավելել, որ ՄԱԱԶԿ-ի կողմից տրամադրվող աջակցության ծրագրի երկրորդ փուլով նախատեսված է կաշվե իրերի արտադրության խթանում: Փորձագետի խոսքով՝ Հայաստանում առկա է արդյունաբերական եւ արտահանման լուրջ ներուժ, ոլորտի զարգացումը նաեւ ապահովում է կանանց զբաղվածությունը։

«Մենք այս ծրագրով գրանցել ենք լավ արդյունքներ, սակայն պետք չէ կանգ առնել, այլ՝ ձգտել առավել խոշոր արդյունքների։ Մեզ համար կարեւոր է, որ ծրագրի ավարտին տեսնենք արդյունավետ համագործակցության օրինակներ ոչ միայն մի քանի կազմակերպությունների հետ, այլեւ ողջ ոլորտի համար ունենանք աջակցության կայուն ինստիտուցիոնալ համակարգ, որը կօգնի նաեւ հետագայում խորացնել փոխգործակցությունը մասնավոր հատվածի եւ ՄԱԱԶԿ միջեւ: Պետք է կարողանանք հասնել արտադրության շատ բարձր որակի՝ շարունակաբար պահելով այդ նշաձողը», - հանդիպման ավարտին ամփոփել է նախարար Կարայանը: