ՀՅԴ–ն նահանջում է. «Փաստ»
Մամուլ
«Փաստ» օրաթերթը գրում է.
Բազմասեր Առաքելյանը չի ստանա «կարոտած» ծեծը
Արագածոտնի մարզի Փարպի գյուղում ՀՀԿ–ից ռեյտինգայինով առաջադրված Բազմասեր Առաքելյանի ու ՀՅԴ համակրի միջև արձանագրված միջադեպը, ինչպես ՀՅԴ ներկայացուցիչներն էին նկարագրել՝ ծեծը, սպառնում էր դրամատիկ զարգացումներ ունենալ, եթե, իհարկե, ՀՅԴ–ն չնահանջեր իր հայտարարությունից:
Նշենք, որ ՀՅԴ ներկայացուցիչ, «Երկիր մեդիա» հեռուստաընկերության տնօրեն Գեղամ Մանուկյանը իր ֆեյսբուքյան էջում կիրակի օրը «Պատգամավոր Առաքելյան Բազմասերի սիրտը ծե՞ծ է սիրում» վերտառությամբ գրառումում նշել էր , որ Արագածոտնում վիճակը լարված է, ու ՀՀԿ ռեյտինգային ցուցակով Արագածոտնի մարզում առաջադրված, «ԲՀԿ–ից փախած պատգամավոր» Բազմասեր Առաքելյանը կողմնակիցների հետ Փարպի գյուղի իր տանը դաժանորեն ծեծել է համագյուղացուն, որը քվեարկելու է ոչ թե իր, այլ Դաշնակցության օգտին, ու նրան արդեն տեղափոխել են հիվանդանոց։ Բացի դա, ըստ Մանուկյանի, ծեծը շարունակվել է այլ տեղ. մարզիկ–պատգամավորն ու կողմնակիցները հարձակվել են նաև տուժածի եղբոր վրա, սակայն այս անգամ, անազնիվ, մի քանի տասնյակով մեկի դեմ տարբերակը չի գործել, ու նրանք պատասխան են ստացել։
Չնայած, ըստ ՀՅԴ–ականի գրառման՝ մարզում դաշնակցականները հայտարարում են, որ իրենց ցանկացած համակիր ու կուսակցական ընկեր անպաշտպան չի մնա, «Բազմասերն էլ իր այդքան «կարոտած» ծեծն էլ անպայման կստանա, երեկ արդեն ՀՅԴ–ականները խուսափողական պատասխաններ էին տալիս՝ հիմնականում հայտարարելով, թե տեղյակ չեն կատարվածից:
ՀՅԴ Արագածոտնի պատասխանատու Համբարձում Կարապետյանը մարզում լարվածության մասին «Փաստի» հարցին խուսափողական պատասխան տվեց` ասելով, որ ինքը Երևանից նոր է գնացել մարզ ու տեղյակ չէ կատարվածից, իսկ Փարպի գյուղի ՀՅԴ պատասխանատուն մարզպետ Գաբրիել Գյոզալյանն է: Արագածոտնի մարզպետը հրաժարվեց գնահատական տալ կատարվածին՝ հայտարարելով, որ ինքը չէ Փարպի գյուղի պատասխանատուն:
ՀՅԴ ԳՄ անդամ Արսեն Հայրապետյանը «Փաստի» հարցին, թե ինչ իրավիճակ է մարզում և եթե բախում լինի, ինչ են պատրաստվում անել, ասաց. «Կարծում եմ` Դաշնակցությունը ցանկացած իրավիճակից հաստատ արժանապատիվ դուրս կգա»: Հայրապետյանը այդպես էլ ուղիղ չասաց՝ ՀՅԴ պատասխան քայլը կլինի՞, թե՞ ոչ:
Արագածոտնում ՀՅԴ ռեյտինգայիններից ամենաանցողիկը համարվող «Երևան» բժշկական կենտրոնի տնօրեն Տարոն Տոնոյանը «Փաստի» հետ զրույցում նույնպես ասաց, որ տեղյակ չէ կատարվածի մանրամասներին: «Էդ երիտասարդին էլ չեմ ճանաչում անձնապես: Նախկինում իր հոր, հորեղբոր հետ բավականին մտերմիկ, ընկերական հարաբերություններ են եղել: Պիտի հասկանամ՝ պատճառն ինչ է եղել և իրականությունը որն է: Եթե իրականությունն այն է, ինչպես ներկայացվում է, միանշանակ դատապարտելի է նաև իմ կողմից: Մի բան գիտեմ, որ այդ երիտասարդների հայրը իրենց հետ բարեկամական կապեր ունի»,– ասաց նա:
Մեր հարցին, թե ՀՅԴ–ի կողմից պատասխան ծեծը սպասվում է Բազմասեր Առաքելյանին, ՀՅԴ թեկնածուն ասաց. «Ես չեմ կարծում, որ էդ մակարդակով մենք պետք ա միմյանց պատասխանենք: Եթե մենք օրինական երկիր ենք, պետք է ամեն ինչ օրինականության սահմաններում լինի: Վենդետայի տարբերակները ես բացառում եմ»:
Այս պահվածքով, թերևս, Դաշնակցությունը տեղի է տալիս ՀՀԿ–ի հետ կոալիցիոն համագործակցությանը: Երեկ արդեն մամուլում Բազմասեր Առաքելյանը հայտարարել է, թե այդ ամենն արվում է մարզում իր վարկանիշի վրա սև գիծ թողնելու նպատակով, և որ ինքն իրեն թույլ չի տա մարդ կանչի տուն ու ծեծի:
Մինչ այդ, ՀՀ Արագածոտնի մարզի դատախազի կողմից միջադեպի վերաբերյալ հրապարակումները ուղարկվել են ՀՀ ոստիկանության Աշտարակի բաժին՝ ՀՀ քրեական դատավարության օրենսգրքի 180–181–րդ հոդվածներով նյութեր նախապատրաստելու համար:
Շարունակությունը` «Փաստ» օրաթերթի այսօրվա համարում:
1
2
3
4
5
1
2
3
4
5
1
2
