16 ժամ աշխատել եմ ու 100 դրամ վաստակել, տենց ո՞նց կլինի. գործադուլ հայտարարած վարորդ (ֆոտո)

Այսօր առավոտից գործադուլ հայտարարած թիվ 39 երթուղու ավտոբուսի վարորդները միայն թիվ 12 ավտոբուսային երթուղու փոփոխությունից հետո կսկսեն աշխատել:  Այս մասին NEWS.am-ի հետ զրույցում նշեց 39 համարի երթուղու ավտոբուսի վարորդներից Արսեն Հակոբյանը :

«Փետրվարի 28-ին 12 համարը մտցրել են մեր գիծ, երեկ 16 ժամ աշխատել եմ, բայց ընդամենը 100 դրամ գումար եմ վաստակել: Մենք չենք ուզում չաշխատել, մենք ուզում ենք աշխատել, բայց սենց հնարավոր չի: Հերիք չի, որ 67, 52 համարի մարշրուտկաները, 2 համարի տրոլեյբուսը էլի նույն գծով են գնում, մի հատ էլ սա: Մենք ի՞նչ անենք: Ուղեւորները` արտագաղթի պատճառով քչանում են, իսկ մարշրուտկաները շատանում: Երեկ ես 16 ժամ աշխատել եմ, գնացել եմ տուն ու ընդամենը 100 դրամի համար: Ամբողջ օրը 100 դրամի համար»,-նշեց նա:

Վարորդ Աշոտ Ավետիսյան խոսքով` իրենց միակ բողոքը տրանսպորտի վարչությունից է ու այն 3 կանգառները, որոնցից ուղեւոր էին վերցնում, այլեւս չկան:

«3 օր ա, 12 համարի մարշուտկեն բերել մտցրել են ու հիմա մենք չենք կարողանում աշխատել: Էն 3 կանգառները, որոնցից մենք ուղեւոր էինք վերցնում հիմա էտ մարշրուտկեն ա տանում: Կարելի ա ասել, որ իմ էրեխու հացն են խլում: 15 վարորդ հիմա կանգնած են ու չեն շարժվելու տեղից, մինչեւ 12 համարի ավտոբուսը չհանեն մեր գծից: Մեր բողոքը միայն տրանսպորտի վարչությունից է: Էկան, հորդորեցին մեզ աշխատել, երեկ աշխատեցինք ու ինչի՞ համար, 100 դրամի՞»,-նշեց նա:

Այս խնդրի առնչությամբ, Երեւանի քաղաքապետարանի աշխատակազմի տրանսպորտի վարչությունից NEWS.am-ին հայտնեցին, որ ավտոբուսային թիվ 12 երթուղու ուղեգծի մասնակի փոփոխությունը (Շիրազի, Մազմանյան փողոցների հատվածում) հարկադրված քայլ է՝ այդ հատվածով շահագործվող միկրոավտոբուսային հ.31Ա երթուղու փակվելու հանգամանքով պայմանավորված: Ըստ քաղաքապետարանի՝ փակված երթուղին միակն էր, որն ապահովում էր նշված հատվածից դեպի Աջափնյակ եւ Դավիթաշեն վարչական շրջաններ տանող ուղեւորափոխադրումները։ Նաեւ նշենք, որ այժմ անհրաժեշտ աշխատանքներ են տարվում ավտոբուսային հ.39 երթուղու սպասարկումը վերականգնելու ուղղությամբ։