Օրվա բաղադրատոմսը. տորթ «Թռչնի կաթ»

Բաղադրիչներ

Խմորի համար՝

ձու - 4 հատ (դեղնուց)

շաքարավազ - 60գր

ալյուր -60գր

Սուֆլեի համար՝

ժելատին - 25գր (կարելի է փոխարինել

7 գրամ ագար-ագարով)

ջուր - 140մլ

շաքարավազ - 400գր

կարագ - 200գր

խտացրած կաթ - 100գր

ձու - 2 հատ (սպիտակուց)

Ջնարակի համար՝ շոկոլադ սև - 150գր

Պատրաստման եղանակ Թրջում ենք ժելատինը սառը ջրում ու թողնում 1 ժամ: Խմորի համար հարում ենք դեղնուցները շաքարավազի հետ մինչև սպիտակելն ու ծավալով ավելանալը, ապա ավելացնում ենք ալյուրն ու զգուշորեն խառնում ներքևից վերև շարժումներով: Ստացված խմորը լցնում ենք ձևամանի մեջ և թխում ջեռոցում 15 րոպե 180 աստիճանում:

Պատրաստի թխվածքը հանում ենք ձևամանից և թողնում, որ սառչի:

Թրջած ժելատինը դնում ենք միջին կրակի վրա և հասցնում եռման աստիճանի, սակայն չենք եռացնում: Ավելացնում ենք շաքարավազն ու վերցնում կրակից: Այս բաղադրատոմսում ժելատինը կարելի է փոխարինել ագար-ագարով (7 գր): Այս դեպքում եփում ենք մինչև 110 աստիճանի հասնելը, ապա հանում ենք կրակի վրայից և թողնում, որ մի քիչ սառչի (մինչև 70-80 աստիճան):

Հարում ենք կարագն ու խտացրած կաթը, մինչև ստացվի միատարր զանգված:

Առանձին ամանի մեջ հարում ենք սպիտակուցները մինչև փրփրելն ու ծավալով ավելանալը, ապա ավելացնում ենք ժելատինը և շարունակում հարել մինչև ստանանք խիտ զանգված: Ստացված զանգվածին ավելացնում ենք հարած կարագային զանգվածն ու կրկին հարում:

Ապա ձևամանի մեջ դնում ենք պատրաստի բիսկվիթը, վրան լցնում սուֆլեն և տեղափոխում սառնարան 1 ժամով:

Ջնարակի համար հալեցնում ենք շոկոլադը ջրի գոլորշու վրա և լցնում պատրաստի տորթի վրա, ապա նորից տեղափոխում սառնարան մինչև ջնարակի սառելը: Ժելատին կիրառելու դեպքում ցանկալի է տորթը պահել սառնարանում: Ագար-ագարի դեպքում կարելի է և սենյակային ջերմաստիճանում պահել:

Եվ մեր համեղ տորթը պատրաստ է:

Վայելելք այս համեղ տորթ «Թռչնի կաթը» մեկ բաժակ սուրճ լատեի հետ: