ԵՄ 6 մլն եվրո է տվել Հայաստանին գյուղատնտեսության և գյուղական շրջանների զարգացման համար

Araratnews.am-ը գրում է.

Եվրոպական միությունը 2015 թվականին 6 մլն եվրո դրամական օգնություն է փոխանցել Հայաստանի կառավարությանը գյուղատնտեսության և գյուղական շրջանների զարգացման նպատակով: Ինչպես Արմենպրեսին տեղեկացրին Եվրոպական միության երևանյան գրասենյակից, գումարը ՀՀ կառավարությանը տրամադրվել է Գյուղատնտեսության և գյուղական շրջանների զարգացման եվրոպական հարևանութ յան ծրագրի շրջանակում:

Հաստատելով գումարի փոխանցումը՝ Հայաստանում ԵՄ պատվիրակության ղեկավար Տրայան Հրիսթեան շնորհավորել է Հայաստանի կառավարությանը և հատկապես Գյուղատնտեսության նախարարությանը անցած տարի գյուղատնտեսական ոլորտի վերաբերյալ ներկայացված ընդհանուր պայմանները բավարարելու կապակցությամբ:

«Ես հասկանում եմ, որ ներկայումս իրականացվում են հաջորդ կարևոր քայլերը, ինչպես օրինակ՝ գյուղատնտեսական զարգացման ռազմավարության միջնաժամկետ վերանայումը, որի հիման վրա երկրորդ փուլում պետք է մշակվի 2015-2025 թվականների նոր ռազմավարությունը: Ես կարևոր եմ համարում, որ այս գործընթացը ներառական է, ունի հստակ նպատականեր, արդյունքներ և ցուցիչներ, ինչպես նաև ավարտին է հասցվել ժամանակին»,- նշել է եվրոպացի դեսպանը:

Դեռևս 2015 թվականի դեկտեմբերին Եվրոպական միությունը հաստատել էր  «Գյուղատնտեսության և գյուղական շրջանների զարգացման եվրոպական հարևանության ծրագրի» շրջանակում Հայաստանի կառավարությանը 25 մլն եվրո ֆինանսական օժանդակության տրամադրումը: Ծրագիրը կիրականացվի 3 տարով, որի ընթացքում ՀՀ պետական բյուջեն կհամալրվի 20 մլն եվրոյով՝ գյուղատնտեսության և գյուղական շրջանների կայուն զարգացման համար: Եվս 5 մլն եվրո առանձին տրամադրվելու է Գյուղատնտեսության նախարարությանը և գյուղատնտեսական խմբերին: