«Միշտ եղել ենք մեկս մյուսի կողքին» Ռոբերտ Սարգսյան

Թիվ 1 ընտրատարածքի պատգամավորի թեկնածու Ռոբերտ Սարգսյանը շարունակում է նախընտրական հանդիպումները: Հանրապետական կուսակցության Ավանի կազմակերպության անդամների հետ միասին այսօր նա հանդիպել է Ավան-Առինջի բնակիչների հետ ինչպես գրասենյակային, այնպես էլ բակային ձևաչափերով:

Ամփոփելով վերջին 4,5 տարիների պատգամավորական գործունեությունը, Ռոբերտ Սարգսյանը շնորհակալություն է հայտնել բնակիչներին՝ վստահության և պարբերական հանդիպումների շրջանակում, նաև նրանց խորհուրդների շնորհիվ, ավելի արդյունավետ աշխատանք կատարելու համար:

«Միշտ եղել ենք մեկս մյուսի կողքին և ոչ թե խոսել ենք, այլ գործ ենք արել, խնդիրներ ենք լուծել: Շատ հարցեր նաև ձեր խորհուրդների շնորհիվ է լուծվել, ինչի համար իսկապես շնորհակալ եմ բոլորիդ»:

Հանդիպմանը ներկա բնակիչներից մեկն էլ՝ նշելով, որ նախորդ անգամ վստահության քվեն Ռոբերտ Սարգսյանին է տվել, քանի որ ճանաչել է նրա զինվորական հորը, ով պարկեշտ ու ազնիվ մարդ է եղել, այս անգամ արդեն հենց Ռոբերտ Սարգսյանին ճանաչելով է ընտրելու նրան, քանի որ այս ընթացքում նա ապացուցել է, որ հոր արժանի զավակն է:

Շնորհակալություն հայտնելով վստահության ու ջերմ խոսքերի համար, Ռոբերտ Սարգսյանը մեկ անգամ ևս ընդգծել է, որ իր համար առաջնահերթը եղել ու շարունակում է մնալ պատասխանատվության զգացումն ու գործը, առավել ևս, երբ առաջնորդվում ես երկրիդ հանդեպ սեփականատիրոջ զգացումով:

«Ոչ միայն լուսահոգի հայրս, այլ նաև ավագ եղբայրս է զինվորական: Նա նաև Արցախյան ազատամարտի մասնակից է եղել ու ես երբևէ չեմ լսել, որ հայրս կամ եղբայրս ասեն. ես սա եմ արել կամ նա եմ արել երկրիս համար: Ես էլ եմ նույն կերպ առաջնորդվում, քանի որ երկիրը մերն է, բոլորինս ու հենց մենք, մեզանից ամեն մեկը պետք է ամեն ինչ անի, որ իսկապես հզոր երկիր փոխանցենք մեր երեխաներին, ոչ թե միայն խոսի ու երազի այդ մասին:

Եվ ես համոզված եմ, որ մենք միասին ապահովելու ենք մեր երկրի առաջընթացը»: Բնակիչներն էլ իրենց հերթին են վստահեցրել, որ պատրաստ են շարունակել համատեղ աշխատանքը և հաջողություն են մաղթել Ռոբերտ Սարգսյանին: