Emirates ընկերությունը ներկայացրել է՝ ինչպես են թռչում շեյխերը և թագավորական ընտանիքների անդամները (լուսանկարներ)

Tert.am–ը գրում է.

Տարեցտարի Emirates ավիաընկերության առաջին դասը ճանաչվում է լավագույնն աշխարհում։ Նրանց ինքնաթիռները կահավորված են այնպիսի շքեղությամբ, որ նույնիսկ թագավորական ընտանիքի անդամները, աստղերը և քաղաքական գործիչներն են այդ ավիաընկերությունը նախընտրում իրենց անձնական ինքնաթիռների փոխարեն, գրում է Комсомольская правда-ն։

«Մեր ավիաընկերությունն ունի 133 հատ Boeing-777 ինքնաթիռ, և նրանցից յուրաքանչյուրում կա առաջին դասի 8-12 առանձին սենյակ։ Այդ սենյակներում կան հարմարավետ բազկաթոռներ, հեռուստացույցներ և աշխատասեղաններ»,- նշել է Ռուսաստանում ընկերության տնօրեն Եգոր Պլախովը։

Նրա խոսքով՝ Մոսկվայից Դուբայ չվերթի ժամանակ, որը տևում է 5 ժամ, թռիչքի մեծ մասը զբաղեցնում է տարբեր ուտելիքի և խմիչքների հերթականությունը։ Թռիչքի ընթացքում նախատեսված է ուտեստների 5 փոփոխություն։ Բացի այդ, յուրաքանչյուր ուղևոր ունի իր մինի-բարը։

Emirates-ի ինքնաթիռները հագեցած են ժամանցային համակարգով, որը թույլ է տալիս ֆիլմեր և հեռուստաալիքներ դիտել աշխարհի մոտ 35 լեզուներով։ Թեև այդ ծառայությունը կա նաև էկոնոմ դասում։ Ինքնաթիռում կա նաև Wi-Fi, որը թույլ է տալիս ստուգել էլեկտրոնային փոստը և սոցկայքերը։

«Ինտերնետին միանալը վճարովի է, ընդամենը 1 դոլար, ընդ որում՝ այդ գումարը գնում է բարեգործության»,- նշել է Պլախովը։

Անհրաժեշտության դեպքում ինքնաթիռի առանձին սենյակը կարող է վերածվել աշխատասենյակի։ Սակայն եթե կարևոր գործեր չկան, ապա կարելի հանգստանալ։ Ինքնաթիռում կա SPA և լոգասենյակ։ Ժամանելուց հետո առաջին դասի ուղևորները կարող են օգտվել անձնական վարորդի ծառայությունից։