ՀՀ-ՌԴ համագործակցության նոր ծիլեր

Մարինա Ներսեսյանը ֆեյսբուքյան իր էջում գրում է .

Ինչպես գիտենք, ՀՀ վարչապետ Հովիկ Աբրահամյանն աշխատանքային այցով գտնվում էր Մոսկվայում: Եթե փորձենք վերլուծել, ապա կարող ենք փաստել, որ վերջին շրջանում տեղի ունեցող զարգացումների ֆոնին, աշխատանքային այցը նոր հեռանկարներ է խոստանում հայ-ռուսական տնտեսական ծրագրերի իրականացման համար։

ՀՀ և ՌԴ վարչապետները քննարկել են ինչպես արդեն սկսված համատեղ ծրագրերը, այնպես էլ նոր նախագծերի իրականացումը: Հարկ է նշել նաև, որ մինչ այդ օրերս երկու երկրների վարչապետերը հեռախոսազրույց էին ունեցել, որի ժամանակ քննարկել էին հայ-ռուսական տնտեսական հարաբերությունների ակտիվացման հեռանակարները և նախատեսվող ծրագրերը։

Ըստ էության երկու երկրների վարչապետերի վերջին շրջանի ակտիվ շփումները պայմանավորված են տնտեսական գործընթացների աշխուժացման անհրաժեշտությամբ, քանի որ ՌԴ-ի նկատմամբ կիրառվող պատժամիջոցների հետևանքով նրանք բախվել են որոշակի օբյեկտիվ խնդիրների: Ռուսական շուկայում անհարմարություններ են ստեղծվել առավելապես հայկական ապրանքների իրացման համար՝ հանգեցնելով առևտրաշրջանառության ծավալների նվազեցմանը, ուստի հանդիպման ժամանակ քննարկվել են նաև խնդրի լուծման համար հնարավոր միջոցները:

ՀՀ և ՌԴ համագործակցության շրջանակներում ակնկալվում է նաև փոխգործակցության ընդլայնում ինչպես էլեկտրոէներգիայի, այնպես էլ գազամատակարարման ոլորտում: Բոլորիս է հայտնի, որ հունվարի 1-ից նվազեցվել է Հայաստանին մատակարարվող ռուսական գազի գինը` նախկին 189 դոլարի փոխարեն, այն դարձել է 165 դոլար, ինչն էլ հնարավորություն է տվել խուսափել դոլարի բարձրացման հետևանքով գազի թանկացումից: