Շատ մեծ աշխատանք է կատարվել. Սերժ Սարգսյանը՝ ԱՊՀ դիտորդական առաքելությանը (Ֆոտո)

ՀՀ նախագահ Սերժ Սարգսյանն այսօր՝ ապրիլի 3-ին, ընդունել է ս.թ. ապրիլի 2-ին կայացած ՀՀ խորհրդարանական ընտրությունների ընթացքում դիտորդական առաքելություն իրականացնելու նպատակով Հայաստան ժամանած ԱՊՀ դիտորդական առաքելության պատվիրակությանը՝ ԱՊՀ գործադիր քարտուղար Սերգեյ Լեբեդեւի գլխավորությամբ:

ՀՀ նախագահի մամուլի գրասենյակից NEWS.am-ին հայտնում են, որ Հանրապետության նախագահը ողջունել է պատվիրակությանը Հայաստանում, շնորհակալություն հայտնել ընտրությունների դիտարկմանը առաքելության ակտիվ մասնակցության համար:

Նախագահը վստահություն է հայտնել, որ ԱՊՀ դիտորդների մասնագիտական կազմը ընտրությունների արդյունքների վերաբերյալ կներկայացնի հավասարակշռված, անաչառ ամփոփիչ հաշվետվություն, կհնչեցնի իր գնահատականները, դիտարկումներն ու խորհրդատվությունները, որոնք կնպաստեն Հայաստանում ընտրական գործընթացների շարունակական կատարելագործմանը:

Սերժ Սարգսյանը մեկ անգամ եւս ընդգծել է սահմանադրական բարեփոխումներից հետո կայացած խորհրդարանական ընտրությունների կարեւորությունը Հայաստանի համար եւ նշել, որ ընտրությունները միջազգային չափանիշներին համապատասխան անցկացնելու նպատակով իրականացվել է նախապատրաստական շատ մեծ աշխատանք՝ քաղաքացիական հասարակության, քաղաքական ուժերի, գործընկեր կազմակերպությունների եւ կառույցների աջակցությամբ ու գործուն մասնակցությամբ:

Հայաստանն անցում է կատարում կառավարման նոր համակարգի, եւ նախագահ Սարգսյանի համոզմամբ, չափազանց կարեւոր է, որ տեղի ունեցած ընտրություններն իրենց որակով վստահություն ներշնչեն Հայաստանի քաղաքացիներին ու բոլոր գործընկերներին:

ԱՊՀ դիտորդական առաքելության ղեկավար Սերգեյ Լեբեդեւը շնորհակալություն է հայտնել իր գլխավորած առաքելությանը Հայաստան հրավիրելու համար:

Սերգեյ Լեբեդեւն ընդգծել է, որ բավականին լուրջ մոտեցում է ցուցաբերվել դիտորդական առաքելության ձեւավորմանը՝ կազմում ընդգրկելով ԱՊՀ 8 երկրից 172 ներկայացուցիչ: Առաքելությունը, որը ս.թ. մարտի 14-ից Հայաստանում է, նրա հավաստմամբ, եղել է բոլոր մարզերում եւ իր մասնագիտական աշխատանքն իրականացնելիս ԿԸՀ-ից ու ընտրական գործընթացների համար պատասխանատու բոլոր կառույցներից եւ կազմակերպություններից ստացել է անհրաժեշտ աջակցություն, ինչի արդյունքում կարողացել է ձեւավորել գործընթացի վերաբերյալ բավականին լայն եւ օբյեկտիվ պատկեր:

ԱՊՀ դիտորդական առաքելության ղեկավարը գոհունակությամբ է փաստել ընտրություններին տեղական մեծաքանակ դիտորդների մասնակցությունը, որը, նրա խոսքով, աննախադեպ է:

Հանդիպմանը զրուցակիցները քննարկել են նաեւ ԱՊՀ շրջանակներում համագործակցության զարգացմանը վերաբերող հարցեր: