Մենք զոռով աղջիկ ուզելու ցանկություններ չունենք. Շարմազանովը՝ «Ծառուկյան» դաշինքի ու «Ելքի» հետ կոալիցիա կազմելու մասին

Հայաստանի հանրապետական կուսակցությունը Հայ Հեղափոխական դաշնակցության հետ հետագա համագործակցությունը չի բացառում: Այս մասին այսօր՝ ապրիլի 3-ին, ՀՀԿ ԳՄ նիստից հետո լրագրողների հետ զրույցում ասել է ՀՀԿ մամուլի քարտուղար Էդուարդ Շարմազանովը:

 «ՀՅԴ-ի հետ ունենք համագործակցության հուշագիր, որը կարճաժամկետ չէ, որը ռազմավարական է, ծրագրային ու գաղափարական: Հաշվի առնելով այն հանգամանքը, որ ՀՅԴ-ն հաղթահարել է 5 տոկոսանոց շեմը, ապագա համագործակցույունը չեմ բացառում, »,-ասել է նա:

Էդուարդ Շարմազանովը նշել է, որ խորհրդարանական ընտրությունների արդյունքում Ազգային Ժողով անցած մյուս երկու ուժերի՝ «Ծառուկյան» դաշինքի ու «Ելքի» կողմից համագործակցելու, կամ կոալիցիա կազմելու առաջարկություն կուսակցությունը չի ստացել:

«Մնացած երկու ուժերը երբեք ցանկություն չեն էլ հայտնել մեզ հետ ճանապարհ անցնելու կամ կոալիցիա մտնելու, մենք էլ զոռով աղջիկ ուզելու ցանկություն չունենք»,-ասաց նա:

Նշենք, որ ԿԸՀ-ն հրապարակել է ԱԺ ընտրությունների նախնական արդյունքները, ըստ որոնց՝ արդյունքները բաշխվել են հետեւյալ կերպ. Հանրապետական կուսակցություն- 49,12 տոկոս, «Ծառուկյան» դաշինք՝ 27,32 տոկոս, «Ելք» դաշինք՝ 7,77 տոկոս, ՀՅԴ՝ 6,57 տոկոս: Ըստ այդմ, ՀՀԿ-ն կստանա 58 մանդատ, «Ծառուկյան դաշինքը՝ 31 մանդատ, «Ելք» դաշինքը՝ 9 մանդատ եւ ՀՅԴ-ն՝ 7 մանդատ: Ընտրություններին մասնակցած մնացած 5 ուժերը («Ազատ դեմոկրատներ, «Հայկական վերածնունդ», ՕՐՕ դաշինք, «Կոնգրես-ՀԺԿ» դաշինք եւ Կոմկուս) չեն հաղթահարել ԱԺ-ում հայտնվելու նվազագույն շեմը:

ԿԸՀ նախնական տվյալներով, ընտրություններին մասնակցել է քվեարկելու իրավունք ունեցող 2 մլն 588 հազար 590 քաղաքացիներից 1 մլն 577 հազար 323-ը: