Եզդիական համայնքի կողմից առաջադրված թեկնածուն ընտրություններն ավելի քան մեկ քայլ առաջ է համարում

Հայաստանի Հանրապետական կուսակցության ցուցակով եզդիական համայնքի կողմից առաջադրված Ռուստամ Մախմուդյանը Tert.am-ի հետ զրույցում նշեց, որ քանի դեռ ընտրության վերջնական պաշտոնական արդյունքները չեն ամփոփվել, վաղ է համարում խոսել իր պատգամավոր դառնալու և առաջիկա իր ծրագրերի մասին: 

Ամեն դեպքում, որպես քաղաքացի նա ասաց, որ նորմալ է գնահատում ընտրությունների անցկացում և համեմատելով նախորդ ընտրությունների հետ՝ ավելի քան մեկ քայլ առաջ է համարում:  

Ինչ վերաբերում է եզդիների առաջնային խնդիրներին, ապա նա ասաց, որ դրանք հիմնականում նույն այն խնդիրներն են, որոնք վերաբերում են ՀՀ քաղաքացիներին: «Եզդիները շեշտադրված առանձնահատուկ խնդիրներ կարծես չունեն»,-ասաց նա:

Հարցին, թե կարողանալո՞ւ է ընդհանուր համայնքի ձայնը ներկայացնել, թե պառակտումներ կան համայնքում, Ռուստամ Մախմուդյանը նշեց. «Կարծում եմ, որ պառակտումներն առանձնապես անհանգստացնող չեն, քանի որ համայնքը առավելապես համախմբված է իմ շուրջ, ինչը վկայում են նաև այս արդյունքները»։

Հայտնենք, որ ԱԺ աշխատակազմի ղեկավար, սահմանադրագետ Հրայր Թովմասյանը նշել էր, որ հաշվի առնելով նախնական տվյալները՝ ՀՀԿ-ն արդեն այդ հաշվարկներն արել է: «Մեր հաշվարկներով ընդհանուր առմամբ՝ ՀՀԿ-ն նոր ձևավորվելիք խորհրդարանում կունենա 58 պատգամավոր, այդ 58 պատգամավորներից 3-ը կլինեն ազգային փոքրամասնության ներկայացուցիչներ եզդիների, ասորիների և քրդերի ներկայացուցիչներից»,-ասել է նա:

Հիշեցնենք, որ ՀՀ Սահմանադրության 89-րդ հոդվածի 2-րդ կետի և ընտրական օրենսդրության համաձայն՝ կուսակցության, կուսակցությունների դաշինքի համապետական ընտրական ցուցակի 2-րդ մասում ընդգրկվում են ընտրությունների նախորդող վերջին մարդահամարի տվյալներով առավել մեծ թվով մշտական բնակչություն ունեցող առաջին չորս ազգային փոքրամասնության ներկայացուցիչները: Ցուցակի 2-րդ մասում պետք է ընդգրկված լինի ոչ պակաս, քան 2, և ոչ ավելի, քան 4 ներկայացուցիչ: Եզդիական համայնքից առաջին հորիզոնականը զբաղեցրել է Ռուստամ Մախմուդյանը: