Քիչ հավանական է, որ Երևանի քաղաքապետի ընտրություններում «Ելք»-ի ցուցակը գլխավորի Նիկոլ Փաշինյանը. Էդմոն Մարուքյան (տեսանյութ)

4 Ապրիլ, 2017 23:45

Քիչ հավանական է, որ Երևանի քաղաքապետի ընտրություններին «Ելք դաշինքի» ցուցակը գլխավորի Նիկոլ Փաշինյանը. Tert.am-ի հետ զրույցում այս մասին ասաց «Ելք» դաշինքից պատգամավոր ընտրված Էդմոն Մարուքյանը՝ անդրադառնալով հարցին, որ դաշինքի ընդունած հուշագրով քաղաքապետի ընտրություններին «Ելքը» պետք է մասնակցի, մինչդեռ ցուցակը գլխավորող եռյակից Երևանի գրանցում ունի միայն Նիկոլ Փաշինյանը:

Ըստ Մարուքյանի՝ այլ տարբերակներ են քննարկվում: «Աշխատանքային կարգով ամենօրյա ռեժիմով հանդիպումներ ունենում ենք, բայց դեռևս որոշում չկա, բայց այն, ինչ մամուլում սպրդված է, որ Նիկոլ Փաշինյանը կառաջադրվի՝ քիչ հավանական է»,- ասաց նա:

Անդրադառնալով խորհրդարանական ընտրություններից հետո «Ելք»-ի հասցեին հնչած քննադատություններին՝անմիջապես մրցակից քաղաքական ուժերի թեկնածուների կողմից, թե «Ելքը» «պրոեկտ է», Էդմոն Մարուքյանը նշեց, թե չի ցանկանում որոշ մարդկանց «ցնորքներին» պատասխանել: «Ակնհայտ էր, որ քարոզարշավի ընթացքում «Ելք»-ին խորհրդարան անցնելու բարիերը բավարար էր, բայց մենք ավելին էինք ակնկալում: Ծայրահեղ անակնկալ է ՀՀԿ-ի արձանագրած թվերը, բայց իրականում կա այն, ինչ կա»,-ասաց նա:

Մարուքյանը նշեց, թե, ըստ իրենց հաշվարկների, «Ելք»-ը պետք է նվազագույնը 15 տոկոս ձայն ստանար: «Դա վատագույն պայմաններում, բայց եղավ այն, ինչ եղավ, իսկ եղավ ավելի վատ՝ զանգվածային ընտրակաշառքի դեպքերը, որի մասին բոլորն են խոսում, միջազգային դիտորդներից սկսած, բայց կոնսեսուս կա փող տվողի և փող վերցնողի միջև, և այդ փակ ցիկլը չես կարողանում բացել։ Ինչ մնում է մեզ՝ պետք է օր ու գիշեր աշխատել, որ եղած 120 000 ընտրողը դառնա 1 մլն 200 հազար»,- ասաց նա:

Ինչ վերաբերում է կոչերին, թե մանդատները պետք է վայր դնեն, Մարուքյանը նշեց, թե նման կոչերը ձեռնտու են միայն իշխանությանը: «Նման կոչ կարող էր անել, օրինակ, Աշոտյանը»,-ասաց նա:

Հարցին, թե խորհրդարանում կհամագործակցե՞ն «Ծառուկյան դաշինքի հետ»՝ հաշվի առնելով, որ դեռևս միայն նախնական գնահատականներով «Ծառուկյան» դաշինքը հանդես կգա որպես ընդդիմություն, Էդմոն Մարուքյանը պատասխանեց. ««Ծառուկյան» դաշինքն ունի 30 մանդատ և խորհրդարանում համագործակցությունը պատկերացնում եմ հետևյալ կերպ, որ «Ելք»-ի նախագծերը պետք է պաշտպանեն այդ 30 մանդատներով, որ աջակցեն մեզ, որ ընդդեմ ՀՀԿ-ի և հանուն ՀՀ զարգացման առաջ մղվեն, իսկ եթե պաշտոնապես չեն հայտարարում, կզրկվեն ընդդիմության արտոնություններից, պետք է հայտարարեն։ Այս պահին՝ սպասենք, տեսնենք: Տվյալներ կան, որ ազգային համաձայնության կառավարություն կկազմեն՝ ՀՅԴ-ի և ՀՀԿ-ի հետ»,-ասաց նա:

Առավել մանրամասն՝ տեսանյութում: