Թուրքիա պետությունը, ըստ սահմանադրության, չի կարող միջամտել Պոլսո Հայոց պատրիաքի ընտրությանը. Մաշալյան
Հասարակություն
Պոլսո Հայոց պատրիարքարանի Եկեղեցական խորհրդի նախագահ Սահակ եպիսկոպոս Մաշալյանը մեղադրել է Պոլսո Հայոց պատրիարքի փոխանորդի պաշտոնում մնալ շարունակող Արամ Աթեշյանին`Պոլսո Հայոց պատրիարքի ընտրությունների շուրջ Ստամբուլի նահանգապետարանում տեղի ունեցած բանակցությունների մասին տեղեկություները խեղաթյուրելու համար:
Ինչպես հայտնում է «Ակօսը»` Մաշալյանը շեշտել է, որ «Թուրքիա պետությունն օրինական կարգով չի կարող միջամտել Պոլսո պատրիարքի ընտրություններին, քանի որ դա բացառապես եկեղեցական կարգով լուծվող խնդիր է և Աթեշյանի` պետության արգելքների ու «անհարմար հանգամանքների» մասին պնդումները աբսուրդ են»:
«Քրիստոնյա համայնքներն այս երկրում պետք է ունենան կրոնական ազատություն և իրենց կրոնական ծեսերն անցկացնելու իրավունք: Դա ամրագրված է նաև սահմանադրությամբ», - ասել է Մաշալյանը:
Հիշեցնենք, որ փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի է ունեցել Պոլսո Հայոց պատրիարքի տեղապահի ընտրություն: Ընտրությունից հետո, որում համոզիչ հաղթանակ է տարել Արամ Աթեշյանի հակառակորդ Գարեգին արքեպիսկոպոս Բեկչյանը, անակնկալ կերպով միջամտել է Ստամբուլի նահանգապետարանը: Ստամբուլի նահանգապետի տեղակալը նախքան պատրիարքարանում ընտրությունների սկսվելը ուղարկել էր գրություն, որն իրավաբանորեն անհնար է համարում պատրիարքական ընտրությունների գործընթացի մեկնարկը: Այս գրությունը Պոլսո Հայոց պատրիարքի տեղապահի ընտրություններից անմիջապես հետո պատրիարքարանի հոգևորականներին է ներկայացրել տեղապահի ընտրություններում պարտված փոխանորդ Արամ արքեպիսկոպոս Աթեշյանը և հայտարարել, որ չի հեռանա տեղապահի պաշտոնից:
Արդեն նախօրեին արքեպիսկոպոս Բեկչյանի` Ստամբուլ ժամանելուն պես Արամ Աթեշյանը հրաժարվել է ընդունել արքեպիսկոպոս Բեկչյանին` որպես Պոլսո Հայոց պատրիարքի տեղապահ: Հայտնի է նաև, որ հրավիրված ժողովի ընթացքում Աթեշյանը երկու անգամ լքել է ժողովի սենյակը:
Հանդիպման ընթացքում պայմանավորվածություն է ձեռք բերվել պատրիարքարանի կողմից պաշտոնական նամակ կազմել, որն էլ կուղղվի Էջմիածին:
Հիշեցնենք, որ Պոլսո պատրիարք Մեսրոպ Մութաֆյանը կոմայի մեջ է գտնվում 2008թ.-ից և փաստացի չի կարող կատարել պատրիարքի իր լիազորությունները։ Նրա փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրված է ոչ թե համայնքի, այլ պետության կողմից:
Ստամբուլի հայ համայնքի ներկայացուցիչները տևական ժամանակ է՝ պահանջում էին կայացնել նոր ընտրությունների անցկացման որոշում՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ իրենց ձայների արդյունքում ընտրված անձի:
1
2
3
4
5
1
2
3
4
5
1
2
3
4
5
