Վանաձորի ավագանին ևս մեկ նիստ է գումարելու՝ անկախ նրանից, թե քանի անդամ կներկայանա. Մամիկոն Ասլանյան

Վանաձորի ավագանին ապրիլի 18-ին պատրաստվում է ևս մեկ նիստ գումարել, եթե ավագանու 33 անդամներից կրկին ներկայանան միայն 15-ը: Tert.am-ի հետ զրույցում Վանաձորի քաղաքապետ Մամիկոն Ասլանյանն ասաց, որ ավագանու ոչ բոլոր անդամների ներկայությունը նիստին չի խանգարում իրենց անցկացնել նիստն ու որոշումներ կայացնել:

«Նիստի մասին հայտարարվել է: Ովքեր կգան՝ կգան, եթե չեն գա, մենք մեր նիստը անցկացնելու ենք: Եթե 15-ն էլ ներկայանան, անցկացնելու ենք»,- նշեց Մամիկոն Ասլանյանը:

Մեկ անգամ արդեն Վանաձորի ավագանին մարտի 31-ին արտահերթ նիստ անցկացրել էր, չնայած նրան, որ նիստին մասնակցում էին ավագանու 33 անդամներից ընդամենը 15-ը և քվորում չէր ապահովվել: Tert.am-ի դիտարկմանը, թե ավագանու ընդդիմադիր անդամները հայտարարել են, որ նիստը ապօրինի է գումարվել, և փաստորեն նա պատրաստվում է 2-րդ անգամ էլ ապօրինի նիստ անցկացնել, Ասլանյանը չհամաձայնեց. «Հիմա ես սկսեմ մեկնաբանելը բոլորի ասածնե՞րը: Օրենք գոյություն ունի, հո ասելով չի դա»:

Հարցին՝ օրենքը թո՞ւյլ է տալիս 15 հոգով նիստ անցկացնել, քաղաքապետը պատասխանեց. «Իհարկե, որ թույլ չտար, ո՞նց կանեինք»: Ճշտող հարցին, թե ավագանու 15 անդամի ներկայությունը քվորում չի ապահովում, ինչպե՞ս է օրենքը թույլ տալիս նիստ անցկացնել, ապա Մամիկոն Ասլանյանը պարզաբանեց. «Քվորումը իրավազորությունն է, իսկ նիստը իրավազոր է: Եթե որոշումներ ընդունելու համար բավարար թվով ավագանու անդամներ կան նիստին ներկայացած, ապա քվորում կա»: Ասլանյանը հորդորեց ընթերցել ՏԻՄ օրենքի 64-րդ հոդվածի 3-րդ և 4-րդ կետերը՝ նշելով, որ օրենքում հստակ գրված է: