Սևանը «հարստացել է» 200 հզ մանրաձկով

Araratnews.am-ը գրում է.

Հայաստանի բնապահպանության նախարարությունը, «Սեւանի իշխանի պաշարների վերականգնման եւ ձկնաբուծության զարգացման» հիմնադրամի  կողմից մանրաձկան անհատույց տրամադրման գործընթացի շրջանակներում, նախարարի հրամանով ձեւավորած ընդունող հանձնաժողովի հսկողության ներքո հուլիսի 10-ին Սեւանա լճի Վարդենիսի տարածաշրջանի Կարճաղբյուր գետի գետաբերանում բաց է թողել 40.000 մինչեւ 30 գրամ եւ 160.000 3-5 գրամ կշռող մանրաձուկ: Հիմնադրամի կանոնադրությամբ ամրագրված գործունեության հիմնական նպատակներից է Սեւանա լճում իշխանի պաշարների վերականգնումը: ՀՀ բնապահպանության նախարարությունը եւ հիմնադրամի ղեկավարությունը  նպատակահարմար են գտել եւ որոշում կայացրել ավելի վաղ սկսել ձկան պաշարների ավելացման ծրագիրն:

Միջոցառմանը հետեւել են ՀՀ բնապահպանության նախարար Արամայիս Գրիգորյանը, ՀՀ Նախագահի գլխավոր խորհրդական Արամ Ղարիբյանը, ՀՀ Գեղարքունիքի մարզպետը Ռաֆիկ Գրիգորյանը, ՀՀ գյուղատնտեսության նախարար Սերգո Կարապետյանը, Սեւանա լճի հիմնահարցերի հանձնաժողովի նախագահ Յուրի Ջավադյանը, ՀՀ ԳԱԱ  կենդանաբանության եւ հիդրոէկոլոգիայի գիտական կենտրոնի տնօրեն Բարդուխ Գաբրիելյանը, Սեւանի իշխանի պաշարների վերականգնման եւ ձկնաբուծության զարգացման հիմնադրամի գործադիր տնօրեն Արշակ Աղաջանյանը:

ՀՀ բնապահպանության նախարար Արամայիս Գրիգորյանը, կարեւորելով Սեւանի իշխանի վերականգնմանն ուղղված միջոցառումները, նշել է. «Այսօր շատ կարեւոր խնդիր ենք լուծում, բայց չենք կարող ասել, որ  այս քանակությամբ մանրաձուկ բաց թողնելով ամբողջովին խնդիրը լուծում ենք, սակայն մենք հետեւողականորեն գնում ենք այդ ուղղությամբ:Նախատեսվում է նոյեմբեր ամսին եւս 370.000 հատ մանրաձուկ բաց թողնել Սեւանա լիճ եւ մինչեւ տարեվերջ կունենանք մոտավորապես 600.000 բացթողնված մանրաձուկ: Այն արդյունավետ միջոցառում է եւ արդյունքը կտեսնենք մեկ-երկու տարի հետո: Ծրագիրը շարունակական իրականացնելու ենք եւ մոտ ապագայում կարող ենք խոսել արդյունագործական որսի մասին: Մենք այսօր ունենք մեկ խնդիր` որսագողությունը: Մենք պետք է մեր առաջ խնդիր դնենք` տարածքի ազգաբնակչության իրազեկվածության մակարդակի բարձրացման խնդիրը, որպեսզի ձկան ձվադրման շրջանում եւ ընդհանրապես որսագողությունը նվազեցնենք»:

Բարդուխ Գաբրիելյանը ներկաներին ներկայացրել է Սեւանա լճում ձկնապաշարների մոնիթորինգի ընթացքը եւ բաց թողնվող մանրաձկան որակական ցուցանիշները:

ՀՀ բնապահպանության նախարարն այցելել է նաեւ «Սեւանի իշխան» ՓԲԸ-ի կողմից կառուցվող մանրաձկան արտադրության գործարանի շինհրապարակ, ծանոթացել գործարանի հնարավորություններին, նախատեսված բնապահպանական հեռանկարային ծրագրերին:

Արամայիս Գրիգորյանի հրամանով նախարարության աշխատակազմի բնապահպանական պետական տեսչության պետին եւ «Սեւան» ազգային    պարկ» ՊՈԱԿ-ի տնօրենի տեղակալին հանձնարարվել է մանրաձկան բացթողնման աշխատանքներից հետո բացթողնման վայրերում 3 օր կազմակերպել շուրջօրյա հերթապահություն: