Ովքե՞ր հրաժեշտ կտան կառավարությանը

Խորհրդարանական ընտրությունների վերջնական արդյունքները կամփոփվեն ապրիլի 9-ին կայանալիք ԿԸՀ նիստում: Զուգահեռ գլխավոր ինտրիգը մնում է ձեւավորվելիք կառավարության հարցը: Ինչպես հայտնի է ԱԺ անդրանիկ նիստում գործադիր իշխանությունը հրաժարական կտա, եւ մեկ ամյսա ժամկետում կձեւավորվի նոր կառավարություն: Դեռեւս նախընտրական շրջանում Սերժ Սարգսյանը հայտարարել էր, որ եթե ՀՀԿ-ն մեծամասնություն կազմի, ապա Կարեն Կարապետյանը կշարունակի պաշտոնավարել: ՀՀԿ-ն ստացել է մեծամասնություն, սա ենթադրում է, որ Կարեն Կարապետյանի դիրքերը ամուր են:

Ինչ վերաբերում է նրա կաբինետի անդամներին, ապա Armday.am-ի ունեցած տեղեկություններով կառավարության կազմում էական փոփոխություններ տեղի չեն ունենա: Այդ մասին նախընտրական քարոզարշավի ժամանակ ակնարկել էր նաեւ ինքը՝ Կարեն Կարապետյանը: Մեր ունեցած հավաստի տեղեկություններով երեք նախարարներ միանշանակ պահպանելու են իրենց պորտֆելները: Խոսքը Արդարադատության նախարար Արփինե Հովհաննիսյանի, ՊՆ Վիգեն Սարգսյանի եւ Մշակույթի նախարար Արմեն Ամիրյանի մասին է:

Էդվարդ Նալբանդյանը կվերանշանակվի ԱԳ նախարարի պաշտոնում: Տեղեկությունների համաձայն Սփյուռքի նախարար Հրանուշ Հակոբյանը եւս իր հարցերը կարգավորել է, դարձյալ դիմելով «Տաշիր» գրուպի օգնությանը:

Շրջանառվող տեղեկությունների համաձայն իրենց պաշտոնին հրաժեշտ կտան Աշխատանքի եւ սոցիալական հարցերի նախարար Արտեմ Ասատրյանն ու Սպորտի եւ երիտասարդության հարցերի նախարար Հրաչյա Ռոստոմյանը: 
Առողջապահության նախարար Լեւոն Ալթունյանն էլ կշարունակի պաշտոնավարել, չնայած այն հանգամանքին, որ երեկ մամուլում տեղեկություններ հրապարակվեցին, որ Ալթունյանին կփոխարինի Արա Բաբլոյանը: 
 

Գյուղատնտեսության նախարար Իգնատի Առաքելյանի եւ ՏՏ, կապի եւ տրանսպորտի նախարար Վահան Մարտիրոսյանի հարցը դեռեւս չի քննարկվել:
Ի դեպ վերջիններս համարվում են Կարեն Կարապետյանի կադրերը, եւ նրանց նշանակման հարցով անձամբ վարչապետն է զբաղվում:

Ինչ վերաբերում է ՀՅԴ-ի նախարարակական պորտֆելներին, ապա այստեղ եւս էական փոփոխություններ չեն սպասվում: Միեւնույն ժամանակ կան տեղեկություններ, որ ՀՅԴ-ին կտրվի եւս մեկ նախարարական պորտֆել, նկատի ունենալով, որ խորհրդարանական ընտրություններում այս անգամ ՀՅԴ-ն ստացել է ավելի շատ ձայն:

Կառավարության առընթեր մարմիններում եւ ուժային կառույցներում եւս էական փոփոխություններ մինչեւ 2018 թվականը չեն լինի:

Փայլակ Ֆահրադյան