Այս ընտրություններին մեծ դեր է խաղացել ոչ թե ընտրակաշառքը, այլ վարչական ռեսուրսը. քաղաքագետ

Այս ընտրություններին մեծ դեր է խաղացել ոչ թե ընտրակաշառքը, այլ վարչական ռեսուրսը: Այս մասին, այսօր՝ ապրիլի 11-ին, «Նախընտրական զարգացումներ Երևանի ավագանու՝ գալիք ընտրությունների շուրջ» թեմայով քննարկման ժամանակ նշել է քաղաքագետ Արմեն Գրիգորյանը:

Նրա խոսքով, միայն երկու ուժ են 2012-ի խորհրդարանական ընտրությունների համեմատ ավելացրել իրենց ձայները՝ ՀՀԿ-ն եւ ՀՅԴ-ն. «Դաշնակցությունը 2012-ի ընտրություններում ստացել է 86 հազար ձայն, այս ընտրություններին՝ 103 հազար, իսկ ՀՀԿ-ն 640 հազարից իր քվեները հասցրել է 770 հազարի»:

Արմեն Գրիգորյանի ներկայացմամբ, ԲՀԿ-ի ձայները, որպես փող բաժանող կուսակցություն, 2012-ի համեմատ 28 հազարով նվազել է, ինչը վկայում է այն մասին, որ կարեւոր ազդեցություն է ունեցել վարչական ռեսուրսը:

«Ընդ որում, ՀՅԴ-ն իր քվեների մեծ մասը ստացել է մարզերում. 103 հազարից մոտ 24 հազարն է ստացել Երեւանում: Փոխարենը ամենաշատ ձայնը ստացել է Գյումրիում՝ 12 հազար, որտեղ ունի մարզպետ»,-ասաց նա ու հավելեց, որ հենց այս թվերն են պատճառը, որ ՀՅԴ-ն որոշել է չմասնակցել Երեւանի ավագանու ընտրություններին. «որովհետեւ Երեւանում նրանք գրեթե ձայն չունեն, նրանց ձայների միայն 20 տոկոսն է Երեւանում: ԲՀԿ-ն եւս Երեւանում ավելի քիչ ձայն ունի, քան մարզերում»:

Անդրադառնալով նրան, թե ինչու են Երևանի ավագանու առաջիկա ընտրություններին միայն երեք ուժ մասնակցում, Արմեն Գրիգորյանը նշեց, որ «Ելքը» մասնակցում է ավագանու ընտրություններին, որովհետև խորհրդարանական ընտրություններին իր ձայների մեծամասնությունը ստացել է Երևանից. «122 հազար ձայներից մոտ 70 հազարը Երեւանից են ստացել, իսկ «Երկիր Ծիրանին» պարզապես առաջին անգամ ընտրությունների մասնակցելու հայտ է ներկայացնում: