Կցանկանայի իսկապես ամուր պառլամենտական համակարգ. Թևան Պողոսյանը՝ սահմանադրական բարեփոխումների մասին

Tert.am-ը գրում է.

ԱԺ «Ժառանգություն» խմբակցության քարտուղար Թևան Պողոսյանը, այսօր հրավիրված ասուլիսին անդրադառնալով սահմանադրական բարեփոխումներին, ասաց, թե պետք է սպասել մինչև հուլիսի 15-ը, երբ կներկայացվի վերջնական տեքստը, ապա ավելի առարկայական խոսել: Իսկ մինչ այդ, ըստ նրա, պետք է վստահ լինել, որ հասարակությունը բարեփոխումների ցանկություն ունի:

«Պետք է ընտրական համակարգն այնպիսին անել, որ հանրաքվեի օրը որևէ մեկը չունենա կասկած, որ իր տեսակետը չի արտացոլվի «այո»-ի և «ոչ»-ի մեջ: Մեր ընտրական համակարգը, ցավոք, չի տալիս այդ վստահությունը»,- ասաց նա և հավելեց, թե մնացած հարցերն արդեն տեխնիկական են, որոնք կքննարկվեն, երբ կներկայացվի տեքստը:

«Մի երկու օր համբերենք տեքստը կլինի և քաղաքական ուժերն իրենց տեսակետը կարտահայտեն, միգուցե փայլուն բան են առաջարկում, աշխարհի ամենալավ սահմանադրությունը, կամ էլ վստահություն չի ներշնչելու առաջարկվող տարբերակը»,-ասաց պատգամավորը:

Թևան Պողոսյանը որպես եվրոպական մոդելի ջատագով իր տեսակետն է հայտնում՝ կողմ է ամբողջովին խորհրադարանական մոդելին անցնելուն: «Բոլորը գիտեն, իմ նախասիրությամբ ես եվրոպական մոդելի կողմնակից եմ, իսկ Եվրոպայում ավելի շատ պառլամենտական մոդել է գործում, ուստի, բնականաբար, կցանկայի իսկապես ամուր պառլամետկան համակարգ»,-ասաց նա։

Պատգամավորը, սակայն, հավելեց, թե եթե հաշվի առնենք, որ ունենք նաև չկարգավորված հակամարտություն և ամենօրյա պատերազմական վիճակ առաջնագծում, ուստի այստեղ պետք է հաշվի առնել նաև անվտանգության հարցերը: Նաև ըստ նրա, կարևոր է դատական համակարգի անկախության պահպանման հարցը:

«Ժառանգություն» խմբակցության պատգամավորի խոսքով՝ պետք է առավելագույն քննարկման փուլ անցնի գործընթացը, և նույնիսկ «ոչ» ասողների և ընդհանրապես անտարբերների դիրքորոշումը ներկայացվի:

«Մեծ վստահություն չունեմ, որ բարեփոխումներն իսկապես ընկալվեն, շատ քաղաքացիներ չեն էլ ընկալում, այսօրվա Սահմանադրությունն ինչպես է աշխատում, որ հիմա էլ նոր փոփոխություն անեն»,- ասաց նա: 

Հարցին, թե Երևանի Բաղրամյան պողոտայում երիտասարդների բողոքն արդյո՞ք կանդրադառնա սահմանադրական բարեփոխումների գործընթացի վրա, Թևան Պողոսյանը պատասխանեց, թե չի կարծում, որ դրանք միմյանց հետ կապ ունեն: «Երիտասարդները կարողացան Բաղրամյանում արթնացնել քնած պետական մեքենան, շարժումը պետք է անի ամեն ինչ, որ թույլ չտա, որպեսզի պետական մեքենան էլի քնի»,-ասաց նա: