«Փաստ» օրաթերթը գրում է.

Մայիսի 14–ին մայրաքաղաքում կկայանան Երևանի ավագանու ընտրությունները: Ապրիլի 14–ը սահմանված էր որպես վերջնաժամկետ թեկնածուների գրանցման համար: Այսպիսով՝ ընտրություններին կմասնակցի երեք ուժ՝ ՀՀԿ–ն, «Ելքը» և «Երկիր ծիրանին»: «Փաստը» պարզել է, թե կուսակցությունների և դաշինքի կողմից առաջադրված թեկնածուների մեջ գերակշռում են կանայք, թե՞ տղամարդիկ և թե ի՞նչ մասնագիտություններ ունեն ապագա ավագանու անդամները:

ՀՀԿ–ի և «Ելքի» ավագանու անդամ թեկնածուների ցուցակները հրապարակվել էին դեռևս մինչ պաշտոնական գրանցումը, իսկ «Երկիր ծիրանի» կուսակցության ղեկավար Զարուհի Փոստանջյանից բացի, ո՛չ մյուս թեկնածուների անունն էր հայտնի, ո՛չ էլ նրանց հստակ թիվը:

«Երկիր ծիրանին» Երևանի ավագանու ընտրություններին 51 թեկնածու է գրանցել, որի վերջին համարը զբաղեցրած ոմն Ռոբերտ Չիթչյանի անվան վրա գիծ է քաշված: «Երկիր ծիրանիի» թեկնածուների մեջ գերակշռում են կանայք՝ նրանք 28–ն են: Ամենատարեց թեկնածու, 69–ամյա Վահան Համազասպյանը տեխնիկական գիտությունների դոկտոր է: Ամենաերիտասարդը համակարգչային դիզայներ, 21–ամյա Արամ Բադասյանն է: Կուսակցության թեկնածուների մեջ կան և՛ մանկավարժներ, և՛ իրավաբաններ, և՛ բժիշկներ, և՛ անգամ ավիատեխնիկ: Փոստանջյանի կուսակցության կողմից առաջադրված բոլոր թեկնածուներն էլ աշխատանք ունեն:

«Ելք» կուսակցությունների դաշինքն ունի մի փոքր ավելի շատ թվով թեկնածուներ, այն է՝ 63, որից 46–ը արական սեռի ներկայացուցիչ են, 17–ը՝ իգական: Նրանց ցուցակում գերակշռում են 80–ական և 90–ական թվականներին ծնված երիտասարդներ: Ամենաերիտասարդ թեկնածուն 1998 թ. ծնված, «Քաղաքացիական պայմանագիր» կուսակցության անդամ Արմեն Գալջյանն է, ով այս պահի դրությամբ աշխատանք չունի: Ամենամեծ տարիքն ունի անկուսակցական, Կրթության ազգային ինստիտուտի փոխտնօրեն Անահիտ Բախշյանը, ով շուտով կդառնա 70 տարեկան:

Ըստ գրանցված թեկնածուների անձնական տվյալների՝ դաշինքի թեկնածուների մեկ երրորդը՝ 24 հոգին, աշխատազուրկ են: Այստեղ կան անհատ–ձեռներեց, զբոսավար, փաստաբան, ինչպես նաև պետական կառույցներում աշխատող անհատներ:

ՀՀԿ–ն մայիսին կայանալիք ընտրություններին մոտ 70 տեղ ունեցող ավագանու կազմի համար 195 թեկնածու ունի, որից 48–ը կանայք են: Ամենատարեց թեկնածուն նույնպես կին է՝ Հայաստանի ժուռնալիստների միության նախագահ, 85–ամյա Աստղիկ Գևորգյանն է: Ամենաերիտասարդ թեկնածուն աշխատանք չունեցող, 23–ամյա Մարտին Աբրահամյանն է: ՀՀԿ ցուցակում կան և՛ գործող ավագանու անդամներ, և՛ արվեստի ու մշակույթի գործիչներ, և՛ կրթական հաստատությունների տնօրեններ, և՛ Երևանի վարչական շրջանների ղեկավարներ:

Շարունակությունը` «Փաստ» օրաթերթի այսօրվա համարում