Որդու զոհվելու մասին լուրը լսելուց հետո հայրը 2 օր է չի խոսում. Նարեկը սիրած աղջիկ ուներ

Ապրիլի 24-ի երեկոյան Արցախի պաշտպանական դիրքերում հակառակորդի կրակոցից զոհված Նարեկ Հարությունյանի դին արդեն տեղափոխել են հայրենի գյուղ: Մահացած զինվորը ծննդով Շիրակի մարզի Լեռնուտ գյուղից էր:

Նարեկի հորեղբայրը՝ Աբրահամ Հարությունյանը, armtimes.com-ի հետ զրույցում ասել է, որ Նարեկը պարտադիր զինվորական ծառայության է մեկնել 2015 թվականի մայիսին, երկու ամսից վերադառնալու էր տուն: Նարեկը ծառայել էր Ասկերանում, սերժանտ էր:

Հորեղբայրը պատմում է, որ Նարեկի սենյակի վերանորոգումը մեկ-երկու օր առաջ են ավարտել: Ծնողները ցանկացել են բանակից վերադառնալուց հետո ամուսնացնել իրենց որդուն:

«Մի քանի օր առաջ ենք Նարեկի սենյակի վերանորոգումը ավարտել: Տան միակ տղան էր: Հայրն ու մայրը ուզում էին ամուսնացնեին, սիրած աղջիկ ուներ»,-armtimes.com-ի հետ զրույցում ասում է Աբրահամ Հարությունյանը:

Վերջինիս խոսքով՝ եղբոր ընտանիքը սոցիալապես անապահով վիճակում է ապրում, զբաղվում է անասնապահությամբ: Նարեկի հայրը 3-րդ խմբի հաշմանդամ է, չի աշխատում: Հարազատները նշում են, որ Նարեկի մահվան լուրը լսելուց հետո, արդեն երկու օր է ընդհանրապես չի խոսում:

Նարեկը ցանկացել էր վերադառնալուց հետո ընդունվել բուհ: Դասընկերներն ասում են, որ շատ է սիրել անգլերեն լեզու ուսումնասիրել: Լեռնուտում բոլորը սգում են Նարեկի մահը: Նա պարտադիր ծառայությունը ավարտելու էր երկու ամսից: «Ընչի՞ երկու ամիս շուտ եկար, մեր հայ զինվոր, մեր հերոս տղա»,- ասում էր Նարեկի տատիկը:

Հակառակորդի կողմից հրադադարի ռեժիմի խախտման հետեւանքով ապրիլի 24-ին՝ ժամը 17:50-ի սահմաններում, ՊԲ արեւելյան ուղղությամբ տեղակայված զորամասերից մեկի պահպանության տեղամասում մահացու հրազենային վիրավորում է ստացել ՊԲ զինծառայող, 1997թ. ծնված Նարեկ Հմայակի Հարությունյանը:

Նարեկ Կիրակոսյան, Գյումրի